Last updated on September 9th, 2025 at 09:52 am
ಉಪ್ಪುಂದ: ಹೊಟೇಲ್ಗ್ ರೇಟಿಂಗ್ ಕೊರ್ದು ಕಾಸ್ ಮಲ್ಪೊಲಿ ಪನ್ಪಿನ ಮೆಸೇಜ್ ನಂಬುದ್ ಲಿಂಕ್ ಓಪನ್ ಮಲ್ತಿನ ಆಂಜೊವು ಒರಿ 6.16 ಲಕ್ಷ ರೂಪಾಯಿ ಕಲೆವೊಂದಿನ ನಡಕೆ ನಡತ್ದ್ಂಡ್.
ಬೈಂದೂರು ತಾಲೂಕ್ದ ಉಪ್ಪುಂದದ ಶ್ರೀ ದುರ್ಗಾಪರಮೇಶ್ವರೀ ದೇಲಂತಡೆದ ಬಟ್ರ್ ಗುರುಮೂರ್ತಿ ಜಿ. ಹೆಗಡೆ ಮೇರ್ ಆನ್ಲೈನ್ ದಗೆ ಆತಿನಾರ್. ಆರೆನ ಮೊಬೈಲ್ಗ್ ನ್ಯಾಶನಲ್ ಸ್ಟಾಕ್ ಎಕ್ಸ್ಚೇಂಜ್ ಪನ್ಪಿನ ಲಿಂಕ್ ಬತ್ತಿತ್ತ್ಂಡ್, ಅವೆನ್ ಓಪನ್ ಮಲ್ಪುನಗ ಅವೆಟ್ ಹೊಟೇಲ್ಗ್ ರೇಟಿಂಗ್ ಕೊರ್ನ್ಡ ಕಾಸ್ ಮಲ್ಪೊಲಿ ಪನ್ದ್ ತೋಜಾದ್ಂಡ್.
ಆ ಪ್ರಕಾರ ಅರ್ಚಕೆರ್ ಬೊಡೆದಿನ ಬ್ಯಾಂಕ್ ಅಕೌಂಟ್ರ್ದ್ 1,44,000 ರೂಪಾಯಿ ಕಡಪುಡ್ದಿತ್ತೆರ್. ಟಾಸ್ಕ್ ಪಾಯಿಂಟ್ ಶೇ. 90 ದಾತ್ ಆದಿತ್ತ್ಂಡ್, ಶೇ. 100ದಾತ್ ಪಾಯಿಂಟ್ ಮಲ್ತ್ಂಡ ಮಾತ್ರ ಪಾಡಿನ ಕಾಸ್ ಪಿರ ತಿಕ್ಕುಂಡು ಪನ್ದ್ ಅಕುಲು ಪನ್ತೆರ್. ಅಂಚೆನೇ ಬಟ್ರ್ ರಮೇಶೆ ಪನ್ಪಿನಾರೆನ ಅಕೌಂಟ್ರ್ದ್ ಸೆಪ್ಟೆಂಬರ್ 2ತಾನಿ 2,72,700 ರೂಪಾಯಿ ಕಡಪುಡ್ದೆರ್.
ಅವೆರ್ದ್ ಬೊಕ್ಕ ಈರೆನ ಅಕೌಂಟ್ ಫ್ರೀಜ್ ಆತ್ಂಡ್, ಕುಡ ಕಾಸ್ ಪಾಡ್ಂಡ ಮಾತ್ರ ಅನ್ಫ್ರೀಜ್ ಆಪುಂಡು ಪನ್ದ್ ಪೋಡಿಕಟ್ಟಾದೆರ್. ಅಂಚಾದ್ ಮೇರ್ ಕುಡ 1,45,000 ರೂ. ಬೊಕ್ಕ 55,000 ರೂ. ಕಡಪುಡ್ದೆರ್. ಕುಡ ಕುಡ ಕಾಸ್ ಪಾಡೆರೆ ಪನ್ನಗ ತಾನ್ ಮಂಗೆ ಆತಿನ ತೆರಿದ್ ಬೈದ್ಂಡ್. ಆತ್ ಪೊರ್ತಾನಗ ಒಟ್ಟು 6,16,700 ರೂ. ಕಲೆವೊಂದೆರ್. ಈ ಬಗೆಟ್ ಬೈಂದೂರು ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಪ್ರಕರಣ ದಾಕಲಾತ್ಂಡ್.