Last updated on September 9th, 2025 at 11:04 am
ಕುಡ್ಲ, ಸೆ. 09: ಕೂಳೂರುಡು ನಡತಿನ ಭೀಕರ ನಡಕೆಡ್ ಪ್ರೈವೇಟ್ ಆಸ್ಪತ್ರೆ ಒಂಜೆಟ್ ಬೇಲೆ ಮಲ್ತೊಂದಿತ್ತಿನ ಮಾಧವಿ ಪನ್ಪಿನಾರ್ ತೀರ್ದೆರ್. ಆರ್ ಬುಡೊಂದಿತ್ತಿನ ಸ್ಕೂಟರ್ ಅಂಕೆ ತತ್ತ್ದ್, ಸಾದಿದ ನೇಲ್ಯ ಗುಂಡಿಗ್ ಬೂರ್ದೆರ್. ಅವ್ವೇ ಪೊರ್ತುಡು ಪಿರವುರ್ದ್ ಬತ್ತಿನ ಮೀನ್ದ ಲಾರಿ ಆರೆನ ಮಿತ್ತ್ಡೇ ಪೋಯಿನೆರ್ದಾವರ ಮಾಧವಿ ಅಲ್ಪನೇ ತೀರ್ದೆರ್.
ಈ ದಾರುಣ ನಡಕೆ ಅಲ್ಪದಕ್ಲೆಗ್ ಆಕ್ರೋಶ ಉಂಡು ಮಲ್ತಿತ್ತ್ದ್, ಅಕುಲು ಮೂಲ್ಕಿರ್ದ್ ಪಂಪ್ವೆಲ್ ಮುಟ್ಟ ಪೋಪಿನ ಪೆರ್ಸಾದಿದ ಅವಸ್ಥೆದ ಬಗೆಟ್ ಬೆಸರ್ ತೂಪಾದೆರ್. ಈ ಸಾದಿಡ್ ಪಾಕ ಮಲ್ಲ ಮಲ್ಲ ಗುಂಡಿಲು ಇಪ್ಪುನೆರ್ದಾವರ ದಿನಕ್ಕೊಂಜಿ ಎಡ್ತೆಲು ಆವೊಂದುಪ್ಪುವ ಪನ್ದ್ ಮುಟ್ಟದಕುಲು ಪನ್ತೆರ್.
ನಿವಾಸಿಲೆನ ಪ್ರಕಾರ, ಸಾದಿದ ರಿಪೇರಿಗ್ ಸಂಬಂಧಿತಿನ ಅಧಿಕಾರಿಲೆಗ್ ಪಾಕ ಸರ್ತಿ ಬಿನ್ನಪು ಮಲ್ತ್ಂಡಲಾ ಗೋಸ್ಮರಿ ಮಲ್ತೊಂದೇ ಉಲ್ಲೆರ್. ಇಂಚಿನ ನಡಕೆಲು ನಡತಿನೇ ಒರ ತಾಪುರ್ತೋಪು ಕ್ರಮ ಗೆತೊನುನ ನಿಯಮ ಆದ್ ಪೋತುಂಡು ಪನ್ದ್ ಜನೊಕುಲು ಆಕ್ರೋಶ ತೂಪಾಯೆರ್. ಬೇಗೊಡು ಕ್ರಮ ಗೆತೊಂಡಿಜೆರ್ನ್ಡ ನನಲಾ ಏತ್ ಜೂವೊಲು ಈ ಪಡಾಯಿದಿಂಜಿನ ಸಾದಿದ ಗುಂಡಿಲೆಗ್ ಬಲಿ ಆಪನಾ ದಾನ್ನ ಪನ್ದ್ ಎಚ್ಚರ್ಗೆ ಕೊರ್ತೆರ್.