ಕುಡ್ಲ: ಬದಿ ಕೊರ್ಯೆರ ಉಪದ್ರ; ಕಂಡನೆ ಬೊಕ್ಕ ಮಾಮಿಗ್ ಆಜಿ ತಿಂಗೊಲು ಜೈಲ್, ಫೈನ್

Last updated on November 19th, 2025 at 12:17 pm

ಕುಡ್ಲ: ಮದಿಮೆ ಆಯಿ ಬೊಕ್ಕ ಬದಿ ಕೊರ್ಯೆರ ಬೋಡಾದ್ ಕಿರುಕುಳ ಕೊರ್ದು, ಆಕಿನ ಆರೋಪಡ್ ಕಂಡನೆ ಬೊಕ್ಕ ಮಾಮಿಗ್ 6 ತಿಂಗೊಲುದ ಸಾದಾ ಕರ್ಪಿಲ್ಲ ಶಿಕ್ಷೆ ಅಂಚೆನೇ 6 ಸಾರ ರೂ. ದಂಡ ಪಾಡ್ದ್ 3ನೇ ಜೆಎಂಎಫ್‌ಸಿ ನ್ಯಾಯಂತಡೆ ತೀರ್ಪು ಕೊರ್ತುಂಡು.

ಕಂಡನೆ ಪ್ರವೀಣ್ ಕುಮಾರ್ ಬೊಕ್ಕ ಮಾಮಿ ಲಲಿತಾ ಶಿಕ್ಷೆ ಆತಿನಕುಲು

ಪ್ರಕರಣೊದ ಒಲವು
ಪೊಂಜೊವು ಒರ್ತಿ 2016ತ ಏಪ್ರಿಲ್ 11ತಾನಿ ಪ್ರವೀಣ್ ಕುಮಾ‌ರ್ ಪನ್ಪಿನಾರೆನ್ ಮದಿಮೆ ಆದಿತ್ತೆರ್. ಮದಿಮೆ ಆತಿನ ಒಂತೆ ದಿನೊಟೇ, ಕಂಡನೆ ಪ್ರವೀಣ್ ಕುಮಾರ್ ಬೊಕ್ಕ ಮಾಮಿ ಲಲಿತಾ ಪೊಂಜೊವುಗು ತಮೆರಿರ್ದ್ 2 ಲಕ್ಷ ರೂ. ಕಾಸ್ ಅಂಚೆನೇ 10 ಲಕ್ಷ ರೂ. ಮೌಲ್ಯೊದ ಪದ್ದೈ ಬಂಗಾರ್ ಕನಯೆರೆ ಒತ್ತಾಯ ಮಲ್ತ್‌ದ್ ಕಿರುಕುಳ ಕೊರ್ಯೆರ ಪತ್ತ್‌ದೆರ್. 2017 ಸೆಪ್ಟೆಂಬರ್ 11ತ ರಾತ್ರೆ, ಮಾನಸಿಕ ಹಿಂಸೆ ಕೊರ್ತಿನತ್ತಂದೆ, ಕೆರ್ಪ ಪನ್ದ್ ಪೋಡಿಕಟ್ಟಾದೆರ್ ಪನ್ದ್ ಪೊಂಜೊವು ಕುಡ್ಲ ಗ್ರಾಮಾಂತರ ಪೊಲೀಸ್ ಸ್ಟೇಶನ್‌ಡ್ ಒಯಿಲ್ ಬರೆಪಾದೆರ್.

ನ್ಯಾಯಂತಡೆದ ತೀರ್ಪು
ಪ್ರಕರಣೊದ ವಿಚಾರಣೆ ಮಲ್ತಿನ 3ನೇ ಜೆಎಂಎಫ್‌ಸಿ ನ್ಯಾಯಂತಡೆದ ನ್ಯಾಯಾಧೀಶೆ ಸುರೇಶ್ ಮೇರ್, ಆರೋಪೊಲೆನ್ ಸಾಬೀತ್ ಮಲ್ತ್‌ದ್ ನವೆಂಬರ್ 14ತಾನಿ ತೀರ್ಪು ಪ್ರಕಟ ಮಲ್ತ್‌ದೆರ್. ಬದಿ ನಿಷೇಧ ಕಾಯಿದೆದಡಿಟ್ ಆರೋಪಿಲೆಗ್ 6 ತಿಂಗೊಲ್ದ ಸಾದಾ ಕರ್ಪಿಲ್ಲ ಶಿಕ್ಷೆ ಅಂಚೆನೇ 6 ಸಾರ ರೂ. ದಂಡ ಪಾಡ್ದ್ ಆದೇಶ ಕೊರ್ತೆರ್.

ಕಾನೂನು ಪ್ರಕ್ರಿಯೆ
ಈ ಪ್ರಕರಣೊಗು ಸಂಬಂಧಿತ್‌ದ್ ಕುಡ್ಲ ಗ್ರಾಮಾಂತರ ಪೊಲೀಸ್ ಸ್ಟೇಶನ್‌ದ ದುಂಬುದ ಠಾಣಾಧಿಕಾರಿ ಸಿದ್ದನಗೌಡ ಭಜಂತ್ರಿ ಮೇರ್ ದೋಷಾರೋಪಣ ಪಟ್ಟಿನ್ ಸಂದಾದಿತ್ತೆರ್. ಪ್ರಾಸಿಕ್ಯೂಷನ್ ಪರವಾದ್ ಸರ್ಕಾರಿ ಸಕಾಯಕ ಅಭಿಯೋಜಕಿ ಗೀತಾ ರೈ ವಾದ ಮಂಡನೆ ಮಲ್ತಿತ್ತೆರ್.