Last updated on December 2nd, 2025 at 12:00 pm
ಬೆಂಗಳೂರು, ಡಿ. 02: ಬಿಜೆಪಿ ಮಲ್ದಿನ ಸ್ಮಾರ್ಟ್ ಮೀಟರ್ ಟೆಂಡರ್ ಹಗರಣ ಆರೋಪಡ್ ಸಚಿವೆ ಕೆ.ಜೆ.ಜಾರ್ಜ್ಗ್ ರಿಲೀಫ್ ತಿಕ್ಕ್ದ್ಂಡ್. ಸಚಿವೆ ಜಾರ್ಜ್ನ ಮಿತ್ತ್ ದಾಕಲಾದಿತ್ತಿನ ಖಾಸಗಿ ದೂರುನ್ ಕರ್ನಾಟಕ ಹೈಕೋರ್ಟ್ ರದ್ದ್ ಮಲ್ದ್ಂಡ್. ಬಿಜೆಪಿ ನಾಯಕೆರ್ ದಾಕಲ್ತಿನ ಪ್ರಕರಣ ರದ್ದ್ ಮಲ್ತ್ದ್ ನ್ಯಾ. ಎಂ .ಐ. ಅರುಣ್ ಇತ್ತಿನ ಹೈಕೋರ್ಟ್ ಪೀಠ ಆದೇಶ ಮಲ್ದ್ಂಡ್. ಆ ಮುಕೇನ ಅಧಿಕಾರಿಲಾಯಿನ ಗೌರವ್ ಗುಪ್ತಾ, ಮಹಾಂತೇಶ ಬೀಳಗಿ, ಹೆಚ್.ಜೆ.ರಮೇಶ್ ಮೊಕಲೆನ ಮಿತ್ತ್ದ ಕೇಸ್ ಲಾ ರದ್ದಾತ್ಂಡ್.
ಸ್ಮಾರ್ಟ್ ವಿದ್ಯುತ್ ಮೀಟರ್ ವಿಚಾರೊಡು ಭ್ರಷ್ಟಾಚಾರ ಆತ್ಂಡ್ ಪನ್ದ್ ಇಂಧನ ಇಲಾಖೆದ ಮಿತ್ತ್ ಬಿಜೆಪಿ ಲಾಗಿದಿತ್ತ್ಂಡ್. ಸ್ಮಾರ್ಟ್ ಮೀಟರ್ ಗೆತೊನುನೆಟ್ ಭಾರೀ ಅವ್ಯವಹಾರ ಆತ್ಂಡ್. ಬೇತೆ ಕಂಪೆನಿಲೆನ್ ಬುಡ್ದು ದಾವಣಗೆರೆದ ರಾಜಶ್ರೀ ಎಲೆಕ್ಟ್ರಿಕಲ್ಸ್ಗ್ ಕಂತ್ರಾಟ್ ಕೊರ್ತೆರ್. ಈ ಕಂಪೆನಿಗ್ ಬೋಡಾದ್ ಬೇತೆ ಕಂಪೆನಿಲು ಟೆಂಡರ್ಡ್ ಪಾಲ್ಪಡೆಯೊಂದಿಲೆಕ ತೂವೊಂದೆರ್ ಪನ್ದ್ ಬಿಜೆಪಿ ಆರೋಪ ಮಲ್ತಿತ್ತ್ಂಡ್. ಬೇತೆ ರಾಜ್ಯೊಲೆಡ್ 900 ರೂಪಾಯಿಗ್ ತಿಕ್ಕುನ ಸ್ಮಾರ್ಟ್ ಮೀಟರ್ ನ್ 5 ಸಾರರ್ದ್ 10 ಸಾರ ರೂಪಾಯಿಗ್ ಗ್ರಾಹಕೆರೆಗ್ ಕೊರೊಂದುಲ್ಲೆರ್. ಅಂಚಾದ್ ಉಂದೊಂಜಿ ಮಲ್ಲ ಹಗರಣ ಪನ್ದ್ ಆರೋಪ ಮಲ್ತಿತ್ತ್ಂಡ್.
ಸ್ಮಾರ್ಟ್ ಮೀಟರ್ ಟೆಂಡರ್ ಸುಮಾರ್ 10 ಸಾರ ಕೋಟಿ ರೂಪಾಯಿದ ಆಯಿನೆರ್ದಾವರ ಜಾಗತಿಕ ಟೆಂಡರ್ ಲೆಪ್ಪೊಡಾಂಡ್. ಆಂಡ ಕಾಲಿ 354 ಕೋಟಿ ರೂ. ವೈವಾಟ್ ಮಲ್ಪುನ ರಾಜಶ್ರೀ ಎಲೆಕ್ಟ್ರಿಕಲ್ಸ್ಗ್ ಟೆಂಡರ್ ಕೊರ್ತುಂಡು. 10 ವರ್ಸಗ್ 5296 ಕೋಟಿ ರೂಪಾಯಿಗ್ ಕೊರ್ತಿನ ಟೆಂಡರ್ ನ್ ಬೋಡೂಂದೇ 997 ಕೋಟಿ ರೂ. ಟೆಂಡರ್ ಪನ್ಪಿಲೆಕ ತೋಜಾದೆರ್. ಬೆಸ್ಕಾಂ ಸೀಮೆಗ್ ಮಾತ್ರ ಈ ಟೆಂಡರ್ ಅನ್ವಯ ಆಂಡಲಾ ಬೇತೆ ಎಸ್ಕಾಂಲೆಗ್ಲಾ ಉಂದೇ ಸ್ಮಾರ್ಟ್ ಮೀಟರ್ ಗೆತೊನರೆ ಸೂಚನೆ ಕೊರ್ತುಂಡು. ಉಂದು ಅಲಕ್ಕ ಕಾನೂನು ಗ್ ವಿರುದ್ಧ. ಕೇಂದ್ರೊದ ಆರ್ಡಿಎಸ್ಎಸ್ ಯೋಜನೆದ ಅಡಿಟ್ 900 ರೂ.ಗ್ ತಿಕ್ಕುನ ಮೀಟರ್ ನ್ 5 ಸಾರರ್ದ್ 8,800 ರೂಪಾಯಿಗ್ ಗ್ರಾಹಕೆರ್ ಗೆತೊನೊಡಾತ್ಂಡ್. ಉಂದೆಕ್ ಮಾತಾ ಬೆಸ್ಕಾಂ ಅಧ್ಯಕ್ಷೆ ಬೊಕ್ಕ ಇಂಧನ ಸಚಿವೆ ಕೆ.ಜೆ.ಜಾರ್ಜ್ ಅಂಚೆನೇ ಬೇತೆ ಅಧಿಕಾರಿಲೇ ಜಬದರಿ ಪನ್ದ್ ಬಿಜೆಪಿ ಆರೋಪ ಮಲ್ತಿತ್ತ್ಂಡ್. ಆಂಡ, ಬಿಜೆಪಿ ನಾಯಕೆರ್ ದಾಕಲ್ತಿನ ಪ್ರಕರಣೊನು ರದ್ದ್ ಮಲ್ತ್ದ್ ಹೈಕೋರ್ಟ್ ಆದೇಶ ಕೊರ್ತುಂಡು.