Last updated on February 3rd, 2026 at 08:08 am
ಬೆಂಗಳೂರು, ಫೆ. 02: ಬೋಲ್ತೇರ್ ತಾಲೂಕ್ದ ಕುವೊಟ್ಟು ಗ್ರಾಮೊದ ಸಂಬೋಳ್ಯದ ಒರ್ಮ್ಬನೇ ಕ್ಲಾಸ್ದ ಆಣ್ ಸುಮಂತ್ನ್ ಕೆರ್ತಿನ ಪ್ರಕರಣೊದ ಜಡ್ತೆದ ಬಗೆಟ್ ಶಾಸಕೆ ಹರೀಶ್ ಪೂಂಜೆರ್ ಕೋಡೆ ವಿಧಾನಸಭೆಟ್ ಪ್ರಶ್ನೆ ಕೇನ್ದಿತ್ತ್ದ್, ಗೃಹ ಸಚಿವೆ ಪರಮೇಶ್ವರೆರ್ ಜಡ್ತೆದ ಪ್ರಗತಿದ ಬಗೆಟ್ ಒಲವು ಕೊರ್ತೆರ್.
15 ವರ್ಸ ಪ್ರಾಯೊದ, 9ನೇ ಕ್ಲಾಸ್ದ ಆಣ್ ಸುಮಂತ್ ಧನುಪೂಜೆಗ್ ಪೋದಿತ್ತಿನ ಪೊರ್ತುಡು ಕೈತಲ್ದ ಕೆದುಟು ಪುನ ಆದ್ ತಿಕ್ಕ್ದಿತ್ತ್ದ್, ಜಡ್ತೆದ ಬಗೆಟ್ ಒಲವು ಕೊರ್ಯೆರ ಬೋಲ್ತೇರ್ ಶಾಸಕೆ ಹರೀಶ್ ಪೂಂಜೆರ್ ವಿಧಾನಸಭೆಟ್ ಕೇನ್ದೆರ್.
ಇಂದೆಕ್ ಸದು ಕೊರ್ನ ಗೃಹ ಸಚಿವೆ ಪರಮೇಶ್ವರ್ 15 ವರ್ಸೊದ ಆಣ್ ಸುಮಂತ್ ತೋಜಂದೆ ಆತಿನ ಬಗೆಟ್ ಇಲ್ಲದಕುಲು ಒಯಿಲ್ ಬರೆಪಾದಿತ್ತೆರ್, ಅಪಗನೇ ಪೊಲೀಸೆರ್ ಆಣನ್ ನಾಡ್ಯೆರ ಪತ್ತ್ದೆರ್. ಆಂಡ ಒಂತೆ ಪೊರ್ತುಡು ಆಣನ ಪುನ ಇಲ್ಲ ಕೈತಲ್ದ ಕೆದುಟು ತಿಕ್ಕ್ದಿತ್ತ್ಂಡ್. ಈ ಬಗೆಟ್ ಕೊಲೆ ಪ್ರಕರಣ ದಾಕಲಾದಿತ್ತ್ದ್, ಜಡ್ತೆಗ್ ನಾಲ್ ಕೂಟೊಲೆನ್ ಕಟ್ಟ್ದೆರ್ ಪನ್ದ್ ಪನ್ಡೆರ್. ಬೇಗೊಡೇ ಆಣನ ಸಾವುದ ಬಗೆಟ್ ಸತ್ಯ ಎಂಚಿನ ಇತ್ತ್ಂಡಲಾ ಪಿದಯಿ ಬರ್ಪುಂಡು. ಓಲ್ಲ ಉಂದು ಮರ್ಡರ್ ಆದಿತ್ತ್ಂಡ ಕೆರ್ತಿನಕ್ಲೆನ್ ಪತ್ತುವ ಪನ್ದ್ ಪನ್ಡೆರ್.
ಈ ಪ್ರಕರಣೊನು ಗಾತಿಡ್ ಗೆತೊಂದಿತ್ತ್ದ್, ಯಾನ್ ಪೊಲೀಸ್ ಇಲಾಖೆಗ್ ಸೂಚನೆ ಕೊರ್ಪೆ, ಆಯಿನಾತ್ ಬೇಗ ನಾಡ್ ಪತ್ತೊಡು ಪನ್ದ್ ಸೂಚನೆ ಕೊರ್ದು ಕ್ರಮ ಗೆತೊನುವೆ ಪನ್ದ್ ಪನ್ಡೆರ್.