Last updated on February 15th, 2026 at 03:01 pm
ಬೋಲ್ತೇರ್, ಫೆ. 15: ತೀರ್ದಿನ ಅಜ್ಜಿನ ಬೊಜ್ಜಗ ಆರೆಗ್ ಇಷ್ಟದ ಏಮೆದ ಕಜಿಪು ಮಲ್ತ್ದ್ ಬಲಸ್ಯೆರ ಸುದೆಟ್ ಅಕ್ರಮವಾದ್ ಏಮೆಲೆನ್ ಪತ್ತ್ದ್ ಮಾಸ ಮಲ್ಪೆರೆ ತೂನಗ ನಾಲ್ವೆರೆನ್ ಏಮೆಲೆನ ಒಟ್ಟುಗು ಬೋಲ್ತೇರ್ ಸ್ಟೇಶನ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ಕೈದಾತಿನಕ್ಲೆನ್ ಕೇರಳ ರಾಜ್ಯೊದ ಕಾಸ್ರೋಡ್ ಜಿಲ್ಲೆದ ಬದಿಯಡ್ಕ, ಪೆರ್ಡಲ್ ಗ್ರಾಮೊದ ನಿರ್ಜಲ್ ನಿವಾಸಿ ಮಣಿಕಂಠೆ(42), ಮುಲ್ಕಿ ತಾಲೂಕ್ದ ನೆಲ್ಲಿಗುಡ್ಡೆ ನಿವಾಸಿ ರಾಜೇಂದ್ರೆ(54), ಬೆದ್ರ ತಾಲೂಕ್ದ ಶಿರ್ತಾಡಿ ಗ್ರಾಮೊದ ಮಕ್ಕಿ ನಿವಾಸಿ ವಿಘ್ನೇಶ್(32), ಬೋಲ್ತೇರ್ ತಾಲೂಕ್ದ ಬಡಗಕಾರಂದೂರು ಗ್ರಾಮೊದ ಪ್ರಶಾಂತ್(35) ಪನ್ದ್ ಗುರ್ತ ಪತ್ತ್ದೆರ್.
ದಾಳಿದ ಪೊರ್ತುಡು ಆರೋಪಿಲೆನ ಕೈರ್ದ್ ನಾಲ್ ಸೂಟ್ ಪಾಡ್ದಿನ ಏಮೆಲೆನ್ ಉಲಕೈ ಮಲ್ತೊಂದು ನನದ ಜಡ್ತೆಗ್ ಬೋಲ್ತೇರ್ ವಲಯ ಅರಣ್ಯ ಇಲಾಖೆಗ್ ಕೊರ್ತೆರ್. ಫೆಬ್ರವರಿ 13 ತಾನಿ ಆರೋಪಿಲು ಬೋಲ್ತೇರ್ ತಾಲೂಕ್ದ ಉಜಿರೆ ಗ್ರಾಮೊದ ಕಂಟಿನಿ ದ ಅಜ್ಜಿ ದೇವಮ್ಮ ಪನ್ಪಿನಾರೆನ ಸಾವುಗು ಬತ್ತಿತ್ತೆರ್.
ಅಜ್ಜಿಗ್ ಬಾರೀ ಇಷ್ಟದ ಏಮೆದ ಕಜಿಪು ಮಲ್ತ್ ಬಲಸೆರೆ ಅಟ್ಟನೆ ಮಲ್ತಿನ ನಾಲ್ವೆರ್ ಸಂಬಂಧಿಕೆರ್ ಫೆಬ್ರವರಿ14 ತಾನಿ ಬೋಲ್ತೇರ್ದ ಸೋಮವತಿ ಸುದೆಟ್ ಏಮೆಲೆನ್ ಪತ್ಯೆರ ಬನ್ನಗ ಏಮೆಲೆನ ಒಟ್ಟುಗು ಆರೋಪಿಲು ಪೊಲೀಸೆರೆ ಕೈಕ್ ತಿಕ್ಕ್ದ್ ಬೂರ್ದೆರ್. ಮೊಕಲೆನ್ ಬೋಲ್ತೇರ್ ವಲಯ ಅರಣ್ಯಾಧಿಕಾರಿಲು ವಿಚಾರಣೆ ಮಲ್ತಿ ಬೊಕ್ಕ ನ್ಯಾಯಂತಡೆದ ಎದುರು ಬರ್ಯೆರ ನೋಟಿಸ್ ಕೊರ್ತೆರ್ ಪನ್ದ್ ತೆರಿದ್ ಬೈದ್ಂಡ್.