Last updated on May 9th, 2026 at 10:56 am
ಕಡಬ, ಮೇ. 09: ಹಿಂದೂ ಪೊಂಜೊವುಲು ಬೊಕ್ಕ ಜೋಕುಲೆನ್ ಪತ್ತ್ರ್ದ್ ಪಾಡ್ದ್ ಮತಾಂತರ ಮಲ್ತೊಂದುಲ್ಲೆರ್ ಪನ್ಪಿ ಆರೋಪ ಕೇನ್ದ್ ಬತ್ತಿನೆರ್ದಾವರ ಕಡಬ ಪೊಲೀಸೆರ್ ಗುರುವಾರ ರಾತ್ರೆ ಐತ್ತೂರ್ ಗ್ರಾಮೊದ ಕರ್ಮಾಯಿ ಕೈತಲ್ದ ಒಂಜಿ ಇಲ್ಲಗ್ ಪೋದು ಪರಿಶೀಲನೆ ಮಲ್ದಿನ ನಕೆ ವರದಿ ಆತ್ಂಡ್.
ಐತ್ತೂರ್ ಗ್ರಾಮೊದ ಕರ್ಮಾಯಿ ತೆಕ್ಕಾತೀಲ್ ನಿವಾಸಿ ಜೋಸೆಫ್ ಪನ್ಪಿನಾರೆನ ಇಲ್ಲಡ್ ಬೆಂಗಳೂರ್ ಮೂಲೊದ ಪೊಂಜೊವುನಕುಲು, ಆಂಜೊವುನಕುಲು ಬೊಕ್ಕ ಜೋಕುಲು ಸೇರ್ದ್ ಸುಮಾರ್ 25 ಜನ ಉಂತುದಿತ್ತ್ದ್ ಅಲ್ಪ ಅನೈತಿಕ ಚಟುವಟಿಕೆ ಬೊಕ್ಕ ಮತಾಂತರ ನಡತೊಂದುಂಡು ಪನ್ದ್ ಪೊಲೀಸೆರೆಗ್ ಹಿಂದೂ ಸಂಘಟನೆಲೆನ ಮುಕೇನ ಒಲವು ತಿಕ್ಕ್ದಿತ್ತ್ಂಡ್. ಆ ಪ್ರಕಾರ ಅಡೆಗ್ ಪೋದು ಪರಿಶೀಲನೆ ಮಲ್ತಿನ ಪೊಲೀಸೆರ್ ಇಲ್ಲದ ದನಿ ಜೋಸೆಫ್ ಬೊಕ್ಕ ಇಲ್ಲಡ್ ಇತ್ತಿನಕಲೆನ್ ಸ್ಟೇಶನ್ಗ್ ಲೆಪ್ಪುಡಾದ್ ಒಲವು ಒಟ್ಟು ಮಲ್ತ್ದೆರ್.
ಜಡ್ತೆದ ಪೊರ್ತುಡು ಇಲ್ಲಡಿತ್ತಿನ ಬೆಂಗಳೂರುದಕುಲು ಕುಡ್ಲಗ್ ಪ್ರವಾಸೊಗು ಬತ್ತಿನಕುಲು, ಬೆಂಗಳೂರ್ಡ್ ಕ್ರೈಸ್ತ ಧರ್ಮ ಗುರು ಆದುಪ್ಪುನ ಆಂಜೊವು ಒರಿಯನ ಗುರ್ತೊಡು ಆರೆನ ಪಲಯೆ ಜೋಸೆಫ್ರೆನ ಕರ್ಮಾಯಿದ ಇಲ್ಲಗ್ ಬತ್ತಿತ್ತೆರ್ ಪನ್ದ್ ಪನ್ತಿನ ಬಗೆಟ್ ಪೊಲೀಸೆರ್ ತೆರಿಪಾದೆರ್.
ಬೆಂಗಳೂರ್ರ್ದ್ ಬತ್ತ್ದ್ ಜೋಸೆಫ್ರೆನ ಇಲ್ಲಡ್ ಕುಲ್ದಿತ್ತಿನಕುಲು, ಎಂಕ್ಲ ಕರಿನ 15-20 ವರ್ಸೊರ್ದಿಂಚಿ ಸ್ವಯಂ ಪ್ರೇರಿತೆರಾದ್ ಕ್ರೈಸ್ತ ಧರ್ಮೊಡು ಉಲ್ಲ. ಏರ್ಲಾ ಎಂಕ್ಲೆನ್ ಒತ್ತಾಯ ಮಲ್ದಿಜೆರ್, ಮತಾಂತರ ನಡತೊಂದಿಜ್ಜಿ ಪನ್ದ್ ಪನ್ತೆರ್. ಅಕಲೆನ ಪಾತೆರ ಗೆತೊಂದು ಪೊಲೀಸೆರ್ ಅಕಲೆನ್ ಬುಡ್ದು ಕಡಪುಡ್ದೆರ್.