Last updated on May 11th, 2026 at 10:24 am
ಯಬೆಂಗಳೂರ್, ಮೇ.11: ಮೆಗ್ಯೆ ಮಲ್ತಿನ ತಪ್ಪುಗ್ ಪಲಯೆ ಶಿಕ್ಷೆ ತಿನ್ತಿನ ಅವಮಾನಿಯ ನಡಕೆ ಒಂಜಿ ಬೆಂಗಳೂರಡ್ ನಡತ್ದ್ಂಡ್. ಮೋಕೆ ಮಲ್ತಿನ ಮೆಗ್ಯನ ತಪ್ಪುಗು ಪಲಯಗ್ ತಾರಾಮರ ಆಕ್ದಿನ ನಡಕೆ ಬ್ಯಾಡರಹಳ್ಳಿ ಪೊಲೀಸ್ ಸ್ಟೇಶನ್ ಸೀಮೆಡ್ ನಡತ್ದ್ಂಡ್. ಚಂಗಾಯಿನ ಪಲಯನೇ ಕಿಡ್ನಾಪ್ ಮಲ್ತ್ದ್, ಕೈಕಾರ್ ಕಟ್ಟ್ದ್ ಪಾಡ್ದ್ ದೌರ್ಜನ್ಯ ಮಲ್ದಿನ ವೀಡಿಯೋ ಇತ್ತೆ ಆತಂಕ ಉಂಡು ಮಲ್ದ್ಂಡ್.
ಬ್ಯಾಡರಹಳ್ಳಿದ ಶಿವಕುಮಾರ್ ಪನ್ಪಿನಾಯೆ ಜವನ್ದಿ ಒರ್ತಿನ್ ಮೋಕೆ ಮಲ್ತೊಂದಿತ್ತೆ. ಆಂಡ ಮೊಕಲೆನ ಮೋಕೆಗ್ ಪೊಣ್ಣನ ಇಲ್ಲದಕಲೆನ ಬಾರೀ ವಿರೋಧ ಇತ್ತ್ಂಡ್. ಅಂಚಾದ್ ಇಂಚಿಪ ಇರ್ವೆರ್ಲಾ ಇಲ್ಲ್ ಬುಡ್ದ್ ಬಲ್ತ್ ಪೋದಿತ್ತೆರ್. ಉಂದೆರ್ದಾವರ ಪಿಸ್ರಾಯಿನ ಪೊಣ್ಣನ ಅಮ್ಮೆ ಬಸವರಾಜ್ ಬೊಕ್ಕ ಅಕ್ಲೆನ ಸಂಬಂಧಿಕೆರ್, ಶಿವಕುಮಾರ್ ತಿಕ್ಕಂದಿನೆಕ್ ಆಯನ ಪಲಯೆ ಕೊಟ್ರೇಶ್ ಪನ್ಪಿನಾರೆನ ಮಿತ್ತ್ ಪಗೆ ಸಾದ್ಯೆರ ಪ್ಲಾನ್ ಮಲ್ತ್ದೆರ್.
ಕೊಟ್ರೇಶ್ ಬ್ಯಾಡರಹಳ್ಳಿದ ದೇವಸ್ಥಾನ ಒಂಜೆಟ್ ಅರ್ಚಕೆ ಆದ್ ಬೇಲೆ ಮಲ್ತೊಂದಿತ್ತೆರ್. “ಪೊಲೀಸ್ ಸ್ಟೇಷನ್ಗ್ ಪೋಯಿ ಬಲ” ಪನ್ದ್ ನಂಬಾದ್ ಆರೋಪಿಲು ಕೊಟ್ರೇಶ್ನ್ ಕಾರ್ಡ್ ಕಿಡ್ನಾಪ್ ಮಲ್ತ್ದೆರ್. ಒವ್ವಾ ತೆರಿಯಂದಿ ಜಾಗೆಗ್ ಲೆತೊಂದು ಪೋದು, ಕೊಟ್ರೇಶ್ನ ಕೈಕಾರ್ ಕಟ್ಟ್ದ್ ಪಾಡ್ದ್ ತಾರಾಮರ ಆಕ್ದೆರ್.
ಆಕುನ ವೀಡಿಯೋನ್ ಆರೋಪಿಲು ರೆಕಾರ್ಡ್ ಮಲ್ತ್ದೆರ್. “ಶಿವು ಒಲ್ಪ ಇತ್ತ್ಂಡಲಾ ಪೊಣ್ಣನ್ ಕನತ್ ಬುಡ್ಲ” ಪನ್ದ್ ಕೊಟ್ರೇಶ್ಡ ಪನ್ಪಾದ್, ಆ ವೀಡಿಯೋನ್ ಆರೆನ ಸಂಬಂಧಿಕೆರೆಗ್ ಕಡಪುಡ್ದ್ ಪೋಡಿಕಟ್ಟಾದೆರ್. ವೀಡಿಯೋಡು ಕೊಟ್ರೇಶ್ ಆಕೊರ್ಚಿ ಪನ್ದ್ ಜೂವೊಗು ನಟ್ಟುನ ತೋಜಿದ್ ಬೈದ್ಂಡ್. ವೀಡಿಯೋದ ಬೆರಿಟೇ ಕೊಟ್ರೇಶ್ನ ಸಂಬಂಧಿಕೆರ್ ಬ್ಯಾಡರಹಳ್ಳಿ ಪೊಲೀಸೆರೆಡ ಒಯಿಲ್ ಬರೆಪಾದೆರ್. ಏಪ ಪೊಲೀಸೆರ್ ಈ ಪ್ರಕರಣೊದ ಜಡ್ತೆ ಮಲ್ಪೆರ ಪಿದಡ್ದೆರ್ ಪನ್ದ್ ಆರೋಪಿಲೆಗ್ ತೆರಿಂಡಾ ಅಪಗನೇ ಕೊಟ್ರೇಶ್ನ್ ಬುಡ್ದು ಪದ್ರಾಡಾತೆರ್. ಇತ್ತೆ ಬ್ಯಾಡರಹಳ್ಳಿ ಪೊಲೀಸೆರ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.