Last updated on July 29th, 2026 at 11:37 am
ಬೆಂಗಳೂರು: ತುಳುನಾಡ ಸಂಸ್ಕೃತಿ, ಪರಂಪರೆ ಬೊಕ್ಕ ಕಟ್ಟ್ ಕಟ್ಲೆಲೆನ ಭಾಗ ಆದುಪ್ಪುನ ಕಂಬುಲ ತುಳುನಾಡ ಸೀಮೆ ಕಡತ್ದ್ ಪೋವರೆ ಬಲ್ಲಿ ಪನ್ದ್ ಡಾ. ವಿಶ್ವ ಸಂತೋಷ ಭಾರತೀ ಸ್ವಾಮೀಜಿ ಆರೆನ ಉಡಲ ಪಾತೆರ ಪನ್ಡೆರ್.
ಬೆಂಗಳೂರ್ದ ರವೀಂದ್ರ ಕಲಾಕ್ಷೇತ್ರೊಡು ಜುಲೈ 26 ನೇ ಐತಾರದಾನಿ ತುಳುವೆರೆ ಚಾವಡಿ, ಬೆಂಗಳೂರು ಅಟ್ಟನೆ ಮಲ್ತಿತ್ತಿನ 28ನೇ ವರ್ಸೊದ ‘ಪರ್ಬದ ಲೇಸ್’ ಕಾರ್ಯಕ್ರಮೊಡು ಸಾದಗೊ ಬೆನ್ತಿನಕಲೆಗ್ ಮಾನಾದಿಗೆ ಮಲ್ತ್ದ್ ಪಾತೆರ್ನ ಆರ್, ಕಂಬುಲ ಪನ್ಡ ಕಾಲಿ ಎರ್ಲೆನ್ ಗಿಡರುನ ಅತ್ತ್. ತುಳುನಾಡ್ದ ಇತಿಹಾಸ, ಪರಂಪರೆ ಬೊಕ್ಕ ದೈವರಾಧನೆದ ಪಿರನಿಲೆಟ್ ಕಂಬುಲಗ್ ಪಾವಿತ್ರ್ಯತೆ ಉಂಡು. ಅಂಚಾದ್ ಕಂಬುಲ ಪ್ರತಿಷ್ಠೆದ ಕಲ ಆವರೆ ಬಲ್ಲಿ ಪನ್ದ್ ಆರ್ ಪನ್ಡೆರ್.
ನನ, ಕಾಸ್, ಅಂತೊಸ್ತ್ ತೂವೊಂದು ನಾಗಾರಾಧನೆ ಮಲ್ಪರೆ ಬಲ್ಲಿ. ಜನೊಕ್ಲೆಗ್ ಇಪ್ಪುನ ತೊಂದರೆ ತೂದೇ ನಾಗರಾಧನೆ ಮಲ್ಪೊಡು. ನಾಗಾರಾಧನೆ ಪನ್ಡ ಮೂಢನಂಬಿಕೆ, ಆಡಂಬರೋದ ಆಚರಣೆ ಆವರೆ ಬಲ್ಲಿ ಪನ್ದ್ ಆರ್ ಪನ್ಡೆರ್.
ರಾಜಕಾರಣಿಲು, ಗಣ್ಯೆರೆನ್ ಲೆಪ್ಪುನಗ ಯಕ್ಷಗಾನ ಕಲಾವಿದೆರೆನ್ ಗಲಸೆರೆ ಬಲ್ಲಿ. ಯಕ್ಷಗಾನೊದ ಘನತೆನ್ ಒರಿತೊನೊಡು ಪನ್ದ್ ಪನ್ಡಿನ ಆರ್, ಭಜನೆ ತುಳುನಾಡ್ದ ಸಂಸ್ಕೃತಿ ಆದ್ ಬುಲೆಯೊಂದುಂಡು. ಪ್ರತಿ ಇಲ್ಲಡ್ಲಾ ನಲಿಕೆ ಭಜನೆಡ್ ಸಂಸ್ಕೃತಿ ಪರಂಪರೆನ್ ಒರಿಪುನ ಪುನೆಪು ನಡತೊಂದುಂಡು ಪನ್ದ್ ಪುಗರ್ಯೆರ್.
ಕನ್ನಡ ಭಾಷೆದಾತೇ ಪ್ರಾಚೀನ ಭಾಷೆ ತುಳು ಭಾಷೆ. ಮಲೆಯಾಳಂ ಲಿಪಿ ಪುಟ್ಟರೆಲಾ ತುಳು ಲಿಪಿ ನೆವನ. ತುಳುನಾಡ್ದ ಇತಿಹಾಸೊನೇ ಶ್ರೀಮಂತವಾದುಂಡು. ನಮ್ಮ ಸಂಸ್ಕೃತಿ, ಪರಂಪರೆನ್ ನಮ ಒರಿತೊನೊಡು. ತುಳು ಯುವ ಜನತೆಗ್ ಸಂಸ್ಕೃತಿ ಸಂಪ್ರದಾಯೊನು ಮದಪಡೆ ಪನ್ದ್ ಕೆಬಿಪಾತೆರ ಪನ್ಡೆರ್
ಕುಡ ಪರೋಕ್ಷವಾದ್ ಅಂತರ್ಜಾತಿ ಮದಿಮೆಗ್ ವಿರೋಧ ತೋಜಾಯಿನ ಆರ್, ಜಾತಿ ಇಪ್ಪೊಡು. ಪ್ರತಿಯೊಂಜಿ ಜಾತಿಡ್ಲಾ ಒಂಜೊಂಜಿ ಬಗೆತ ಕಟ್ಟ್ ಕಟ್ಲೆ ಇಪ್ಪುಂಡು. ಅವೆನ್ ನಮ ಒರಿತೊನೊಡು ಪನ್ದ್ ಪನ್ಡೆರ್
ದೈವರಾಧನೆ ತುಳುನಾಡ್ಡೇ ಇಪ್ಪೊಡು. ಘಟ್ಟ ಬರ್ತ್ದ್ ಮಿತ್ತ್ ಪೋಪುನ ಸಮ ಅತ್ತ್. ದೈವರಾಧನೆ ತನ್ನತನೊನು ಕಲೆಯೊದುಂಡು. ಆಧುನಿಕತೆದ ಪಜ್ಜೆಗ್ ಸಂಪ್ರದಾಯ ಪದ್ದತಿ ನಿಯಮೊಲೆನ್ ಪಗಪುನ ಎಡ್ಡೆ ಅತ್ತ್ ಪನ್ದ್ ಪನ್ಡೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷೆ ತಾರಾನಾಥ ಗಟ್ಟಿ ಪಾತೆರ್ದ್, ತುಳುವೆರೆ ಇಲ್ಲಡ್ ಸುರುಕು ತುಳು ಭಾಷೆ ಅಧಿಕೃತ ಭಾಷೆ ಆವೊಡು.
ತುಳು ಭಾಷೆ ಪಠ್ಯೊಡು ಎಚ್ಚಿಗೆದ ಭಾಷೆ ಆಂಡ ಕನ್ನಡ ಭಾಷೆಗ್ ಒವ್ವೇ ತೊಂದರೆ ಆಪುಜಿ. ಬರಿತ ಆಂಧ್ರ ಪ್ರದೇಶೊಡು ಉರ್ದು ಭಾಷೆನ್ ಎಚ್ಚಿಗೆದ ಭಾಷೆ ಮಲ್ತ್ಂಡಲಾ ತೆಲುಗು ಭಾಷೆಗ್ ದಾಲಾ ಆತಿಜಿ. ಅಂಚಾದ್, ತುಳು ಭಾಷೆ ಎಚ್ಚಿಗೆದ ಅಧಿಕೃತ ಭಾಷೆ ಆಪುಂಡು ಪನ್ಪಿ ವಿಶ್ವಾಸ ತೋಜಾಯೆರ್.
ಕರ್ನಾಟಕ ಕುಸ್ತಿ ಅಕಾಡೆಮಿ ಅಧ್ಯಕ್ಷೆ ಗುಣರಂಜನ್ ಶೆಟ್ಟಿ ಮೇರ್ ತುಳುನಾಡ್ದ ಜಾನಪದ ಪದೊಕ್ಲೆನ ‘ಸಂಪೊಲಿಗೆ’ ಪುಸ್ತಕ ಬೊಕ್ಕ ‘ಮೋಕ್ಷ’ ತುಳು ಭಜನೆ ವಿಡಿಯೋ ಬುಡುಗಡೆ ಮಲ್ತೆರ್.
ಈ ಪೊರ್ತುಡು ಪ್ರತಿವರ್ಷೊದ ಲೆಕ ಬೇತೆ ಬೇತೆ ಕ್ಷೇತ್ರೊಲೆಡ್ ಸಾದಗೊ ಬೆನ್ತಿನಕಲೆಗ್ ಮಾನಾದಿಗೆ ಮಲ್ತೆರ್. ಪ್ರತಿಷ್ಠಿತ ದಿ. ಡಿ.ಕೆ. ಚೌಟ ಪ್ರಶಸ್ತಿನ್ ಕೃಷಿ ಕ್ಷೇತ್ರೊದ ಸಾಧಕೆ ಕಡಮಜಲ್ ಶುಭಾಷ್ ರೈ ಬೊಕ್ಕ ದಿ. ವಿಜಯ್ ಕುಮಾರ್ ಕುಲಶೇಕರ ನೆಂಪುದ ಪ್ರಶಸ್ತಿನ್ ತುಳು ಭಾಷೆದ ಸೇವೆಗೆ ಪುನೆತಿನ ಜಿ.ವಿ.ಎಸ್. ಉಳ್ಳಾಲ್ ಮೊಕಲೆಗ್ ಕೊರ್ದು ಮಾನಾದಿಗೆ ಮಲ್ತೆರ್. ಅಂಚೆನೇ, ತುಳುನಾಡ್ದ ಸಿರಿ ಪ್ರಶಸ್ತಿಯನ್ನು ಸಮಾಜ ಸೇವಕೆರಾಯಿನ ಕೋಡಿಬೊಟ್ಟು ಅರುಣ್ ಶೆಟ್ಟಿ ಬೊಕ್ಕ ಈಶ್ವರ್ ಮಲ್ಪೆ ಮೊಕಲೆಗ್, ಬೊಕ್ಕ ಶಿಕ್ಷಣ ಅಂಚೆನೇ ಸಾಹಿತ್ಯ ಕ್ಷೇತ್ರೊಡು ಮಾಮಲ್ಲ ಸೇವೆ ಸಂದಾದಿನ ವಿಜಯಲಕ್ಷ್ಮಿ ಕಟೀಲ್ ಮೊಕಲೆಗ್ ಕೊರ್ದು ಮಾನಾದಿಗೆ ಮಲ್ತೆರ್. ಚಿತ್ರಕಲೆಡ್ ಅಪ್ರತಿಮ ಸಾದಗೊ ಬೆನ್ತಿನ ಗಣೇಶ್ ಪಂಜಿಮಾರ್ ಬೊಕ್ಕ ಸುಮಾ ಪಂಜಿಮಾರ್ ಮೊಕಲೆಗ್ ಪ್ರತಿಭಾ ಪುರಸ್ಕಾರ ಕೊರ್ದು ಬೆರಿ ಬೊಟ್ಟಿಯೆರ್.
ಬೆಂಗಳೂರ್ಧ ತುಳುವೆರೆ ಚಾವಡಿದ ಗೌರವಾಧ್ಯಕ್ಷೆ ಪುರುಷೋತ್ತಮ್ ಚೇಂಡ್ಲಾ, ಅಧ್ಯಕ್ಷೆರಾಯಿನ ಮುಂಡಾಲುಗುತ್ತು ವಿಶು ಕುಮಾರ್ ರೈ, ಪ್ರಧಾನ ಕಾರ್ಯದರ್ಶಿ ರಘುವೀರ್ ನಾಯ್ಕ್ ಒತ್ತುಪಾಲ್ ಇತ್ತೆರ್.
ಮಂಗಳೂರು ಬೊಕ್ಕ ಒಡಿಪು ಜಿಲ್ಲೆದ 30ರ್ದ್ಲಾ ಎಚ್ಚ ತುಳು ಸಂಘಟನೆಲು ಈ ಕಾರ್ಯಕ್ರಮೊಡು ಪಾಲ್ಪಡೆಯೆರ್.