Last updated on August 3rd, 2026 at 09:44 am
ಆ. 03: 2026ತ ಗ್ಲ್ಯಾಸ್ಗೋ ಕಾಮನ್ವೆಲ್ತ್ ಗೇಮ್ಸ್ಗ್ ಪರದೆ ಬೂರ್ದ್ಂಡ್. ಇಂದೆತ ಬೆರಿಟೇ, 2030ದ ಕಾಮನ್ವೆಲ್ತ್ ಕ್ರೀಡಾಕೂಟೊದ ಆತಿಥ್ಯೊನು ಭಾರತೊಗು ಅಧಿಕೃತವಾದ್ ಕೊರ್ತೆರ್. ಇಂದೆತ ಒಟ್ಟುಗು, ಶತಮಾನೊದ ಐತಿಹಾಸಿಕ ಗುರ್ತೊದ ಬರ್ಪಿನ ಕಾಮನ್ವೆಲ್ತ್ ಗೇಮ್ಸ್ಗ್ ಗುಜರಾತ್ದ ಅಹಮದಾಬಾದ್ ಬಿನ್ನಾದಿಗೆ ವಯಿತೊನುನ ಪತ್ತ ಆತ್ಂಡ್.
ಗ್ಲ್ಯಾಸ್ಗೋ ಕಾಮನ್ವೆಲ್ತ್ ಗೇಮ್ಸ್ದ ಸಮಾರೋಪ ಸಮಾರಂಭೊದ ಅಕೇರಿಡ್ ಸ್ಕಾಟ್ಲ್ಯಾಂಡ್ದ ಅಧಿಕಾರಿಲು ಕಾಮನ್ವೆಲ್ತ್ ಗೇಮ್ಸ್ ಫೆಡರೇಶನ್ (CGF) ದ ಕೊಡಿ ಬೊಕ್ಕ ಆತಿಥ್ಯೊದ ಬ್ಯಾಟನ್ ನ್ ಭಾರತೀಯ ನಿಯೋಗಗ್ ಕೈಪಗತ್ದ್ ಕೊರ್ತೆರ್. ಭಾರತೊದ ಪರವಾದ್ ಒಲಿಂಪಿಕ್ಡ್ ಬಂಗಾರ್ದ ಪದಕ ಗೆಂದಿನ ನೀರಜ್ ಚೋಪ್ರಾ, ಭಾರತೀಯ ಒಲಿಂಪಿಕ್ ಅಸೋಸಿಯೇಷನ್ (IOA) ಅಧ್ಯಕ್ಷೆದಿ ಪಿ.ಟಿ. ಉಷಾ ಬೊಕ್ಕ ಗುಜರಾತ್ ರಾಜ್ಯೊದ ಉಪಮುಖ್ಯಮಂತ್ರಿ ಹರ್ಷ್ ಸಂಘವಿ ಈ ಬಿನ್ನಾದಿಗೆದ ಹಕ್ಕ್ನ್ ಗೆತೊಂದೆರ್.
ಶತಮಾನೊದ ಕ್ರೀಡಾಕೂಟ
1930ಡ್ ಕೆನಡಾದ ಹ್ಯಾಮಿಲ್ಟನ್ಡ್ ಸುರು ಆತಿನ ಕಾಮನ್ವೆಲ್ತ್ ಕ್ರೀಡಾಕೂಟೊಗು 2030 ಗ್ ಭರ್ತಿ 100 ವರ್ಸ ದಿಂಜುಂಡು. ಈ ಶತಮಾನೊದ ಸ್ಮರಣೀಯ ಆವೃತ್ತಿಗ್ ಭಾರತ ಸಾಕ್ಷಿ ಆವರೆ ಇಪ್ಪುನು ವಿಶೇಷ.
2010 ಟ್ ದೆಲ್ಲಿಡ್ ನಡತಿನ ಕಾಮನ್ವೆಲ್ತ್ ಗೇಮ್ಸ್ರ್ದ್ ಬೊಕ್ಕ ಭಾರತೊಡು ಅಟ್ಟನೆ ಆವೊಂದುಪ್ಪುನ ರಡ್ಡನೇ ಕಾಮನ್ವೆಲ್ತ್ ಗೇಮ್ಸ್ ಉಂದಾದುಂಡು. ಅಂಚಾದೇ ಅಹಮದಾಬಾದ್ಡ್ ನಡಪರೆ ಇಪ್ಪುನ ಕ್ರೀಡಾಕೂಟ ವಿಶೇಷ ಆದುಂಡು.
ಮೆನ್ಕಿನ ಭಾರತೀಯ ಸಂಸ್ಕೃತಿ:
ಕೊಡಿ ಪಗಪುನ ಪೊರ್ತುಡು ಗ್ಲ್ಯಾಸ್ಗೋ ಹೈಡ್ರೋ ಸ್ಟೇಡಿಯಂಡ್ ಭಾರತೊದ ಭವ್ಯ ಸಾಂಸ್ಕೃತಿಕ ವೈವಿಧ್ಯತೆನ್ ತೂಪಾಯೆರ್. ಪುಗರ್ತೆದ ಗಾಯಕೆ ಶಂಕರ್ ಮಹದೇವನ್, ನಟಿ ಮಾನುಷಿ ಛಿಲ್ಲರ್ ಬೊಕ್ಕ ಸಿತಾರ್ ವಾದಕೆ ರಿಷಭ್ ಶರ್ಮಾ ಮುತಾಲಿಕೆಡ್ ನಡತಿನ ಪ್ರದರ್ಶನ ಮಾತೆರ್ನ ಮನಸ್ ಗೆಂದ್ಂಡ್.