Last updated on August 4th, 2026 at 04:30 pm
ಆ. 04: ನೇತ್ರಾವತಿಗ್ ನೀರ್ ಒಡ್ಯುನ ಸುದೆಕುಲೆನ್ ತಿರ್ಗಾದ್, ಪರ್ಪಿ ನೀರ ನೆವನ ಪನ್ಡ್ದ್ ಕೈಗಾರಿಕೆಲೆಗ್ ನಮ್ಮ ನೀರ್ ಕೊರ್ಪುನ ದಗೆತ ಎತ್ತಿನಹೊಳೆ ಯೋಜನೆದ ಬಗೆಟ್ ಇತ್ತೆ ಎಚ್ಚಿನ ತುಳುವೆರೆಗ್ ತೆರಿದೇ ಉಂಡು. ಜನೊಕುಲು ಈತ್ ಪಾತೆರೊಂದಿತ್ತ್ಂಡಲಾ ನಮ್ಮ ಜನಪ್ರತಿನಿಧಿನಕುಲು ನನಲಾ ಈ ಬಗೆಟ್ ಸೊರ ದೆರ್ಪುನ ತೋಜುಜಿ!
ಐಐಎಸ್ಸಿ ದ ಅಧ್ಯಯನೊಡು ಎತ್ತಿನಹೊಳೆಡ್ ಇತ್ತೆ ಅಟ್ಟನೆ ಮಲ್ದಿನ ಜಾಗೆಲೆಗ್ ಪರ್ಪಿ ನೀರ್ ಕೊರ್ಪಿನಾತ್ ನೀರೇ ಇಜ್ಜಿ ಪನ್ದ್ ಪನ್ಡಲಾ, ಆ ವೈಜ್ಞಾನಿಕ ರಿಪೋರ್ಟ್ನ್ ಗೆನ್ಪಂದೆ ಸರಕಾರ ತುಳುನಾಡ್ದ ಬುಲೆಸಲೆ ಎರ್ಕಾವುನ ಅಪ್ಪೆ ನೇತ್ರಾವತಿನ ಪರಪಿ ತಾದಿ ತಿರ್ಗಾದ್, ಅವೇತೋ ವರ್ಸರ್ದ್ ಒಂಜತ್ತೊಂಜಿ ರಿತಿಡ್ ನಮನ್ ಕಾತೊಂದು, ಬಂಜಿಗ್ ಬಡವುಗು ಕೊರ್ದು ತಾಂಕೊಂದು ಬೈದಿನ ಪವಿತ್ರ ಮೂಡಾಯಿ ಘಟ್ಟೊನ್ಲಾ ಒಕ್ಕ್ದ್ ಒಕ್ಕ್ದ್ ನಾಶ ಮಲ್ಪುನ ಬೇಲೆನ್ ಮಲ್ತೊಂದೇ ಉಂಡು. ಪರ್ಪಿ ನೀರ್ ಇಜ್ಜಿಂಡಲಾ ಅಕ್ಲೆನನೇ ಅವೈಜ್ಞಾನಿಕ ವಿಷಯೊನು ಪತೊಂದು ಒಂಜಿ ಇಡೀಯ ಜನಾಂಗೊನೇ ಅರಿಪೆರೆ ಪಿದಾಡ್ದಿನ ಈ ಯೋಜನೆದ ವಿರುದ್ಧ ಇತ್ತೆ ಮಾತಾ ಪ್ರಕೃತಿಪ್ರೇಮಿಲು ಸೇರ್ದ್ ಗೂಗಲ್ ಫಾರ್ಮ್ಡ್ ದಸ್ಕತ್ ಒಟ್ಟು ಮಲ್ಪುನ ಕ್ಯಾಂಪೇನ್ಗ್ ಜತ್ತ್ದೆರ್.
ನಮ್ಮ ಜನಪ್ರತಿನಿಧಿಲೆಗ್ ಎಂಕ್ಲ ಈತ್ ಜನ ಈ ಯೋಜನೆದ ವಿದರುದ್ಧ ಉಲ್ಲ ಪನ್ದ್ ತೆರಿಪಾದ್ ಈ ಯೋಜನೆನ್ ಉಂತಾಯೆರೆ ಒತ್ತಾಯ ಮಲ್ಪೆರೆ, ಸರಕಾರೊದ ಗುಮನೊಗು ಕನಯೆರೆ ಈ ದಸ್ಕತ್ ಕ್ಯಾಂಪೇನ್ ಆವೊಂದುಂಡು.
ದಾದ ಮಲ್ಪೊಡು?
ಮುಲ್ಪ ಕೊರ್ತಿನ ಗೂಗಲ್ ಫಾರ್ಮ್ಡ್ ನಿಕಲೆನ ಈಮೇಲ್, ಪುದರ್, ಜಾಗೆ, ಪ್ರಾಯ ಬೊಕ್ಕ ಲಿಂಗ ದಿಂಜಾದ್ ಸಬ್ಮಿಟ್ ಕೊರ್ನ್ಡ ಆಂಡ್. ಈ ಫಾರ್ಮ್ಡ್ ಆಗಸ್ಟ್ 15 ಮುಟ್ಟ ಬೈದಿನ ರೆಸ್ಪಾನ್ಸ್ ಲೆನ್ ಅಚ್ಚಿ ಗೆತ್ತ್ದ್ ಮುಖ್ಯಮಂತ್ರಿ ಬೊಕ್ಕ ಒಡಿಪು, ಮಂಗಳೂರು, ನಾರ್ತ್ ಕೆನರಾ, ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ, ಬೆಳಗಾವಿ, ಮೈಸೂರ್, ಚಾಮರಾಜನಗರ ಬೊಕ್ಕ ಕೊಡಗ್ದ್ ಶಾಸಕೆರ್, ಸಂಸದೆರೆಗ್ ಕಡಪಾದ್ ಕೊರ್ಪುನ ಬೇಲೆನ್ ವೆಸ್ಟರ್ನ್ ಘಾಟ್ಸ್ ಕಂಸರ್ವೇಶನ್ ಆಂಡ್ ರಿಸರ್ಚ್ ಫಾರಮ್ ಮಲ್ಪುಂಡು. ಗೂಗಲ್ ಫಾರ್ಮ್ : https://docs.google.com/forms/d/e/1FAIpQLSdMfFjgWV61koaV5WRdupPvYTpxpY4O2je8U-IXuuZ1gdV8jQ/viewform