ಬ್ರಿಟಿಷ್ ದಾಸ್ಯೊದ ಪುದರ್‌ಗ್ ಕಡೆಕ್ಲಾ ತಿಕ್ಕುಂಡಾ ಮುಕ್ತಿ?; ದಕ್ಷಿಣ ಕನ್ನಡ ಜಿಲ್ಲೆದ ಪುದರ್ ಪಗಪೆರೆ ಆಂಡ್ ಮಂಡನೆ; ಒಂಜಿ ತಿಂಗೊಲು ಸಾರ್ವಜನಿಕ ಅಭಿಪ್ರಾಯ ಗೆತೊಂದು ನಿರ್ಧಾರ

Last updated on September 19th, 2026 at 10:12 am

ಕುಡ್ಲ, ಸೆ. 18: ಕುಡ್ಲಡ್ ನಡತಿನ ಸಚಿವ ಸಂಪುಟ ಸಭೆಟ್ ತುಳುವೆರೆ ಪಾಕ ವರ್ಸೊದ ಕನೊಟು ರಡ್ಡೆತ ಬಗ್ಗೆ ಸರಕಾರ ಅನುಮೋದನೆ ಕೊರ್ತುಂಡು. ಒಂಜಿ ತುಳು ಭಾಷೆನ್ ಆಡಳಿತ ಭಾಷೆ ಮಲ್ಪುನವು ಕುಡೊಂಜಿ ಈ ಜಿಲ್ಲೆದ ಪುದರ್ ಪಗಪುನವು.

ದಕ್ಷಿಣ ಕನ್ನಡ ಜಿಲ್ಲೆದ ಪುದರ್ ಪಗಪುನ ವಿಷಯೊಡು ಸರಕಾರ ಒಂಜಿ ತಿಂಗೊಲ್ದ ಮಟ್ಟ್‌ಗ್ ಸಾರ್ವಜನಿಕೆರೆ ಅಭಿಪ್ರಾಯ ಒಟ್ಟು ಮಲ್ತ್‌ದ್ ಬೊಕ್ಕ ನಿರ್ಧಾರ ಗೆತೊನುವ ಪನ್ದ್ ಪನ್ತ್ಂಡ್. ಈ ಪೊರ್ತುಡು ತುಳುವೆರಾಯಿನ ನಮ ಮಾತ ಬ್ರಿಟಿಷ್ ದಾಸ್ಯೊದ ಪುದರ್‌ನ್ ಪಗತ್‌ದ್ ನಮ್ಮ ಜಿಲ್ಲೆಗ್ ಚಾರಿತ್ರಿಕವಾದ್ ಇತ್ತಿನ ‘ಮಂಗಳೂರ್’ ಪುದರ್‌ನ್ ದೀವೊಡು ಪನ್ದ್ ಜನಪ್ರತಿನಿಧಿಲೆಗ್ ತೆರಿಪಾವೊಡು, ಸರಕಾರೊಗು ತೆರಿಪಾವೊಡು. ಇಡೀ ದೇಶೊನೇ ದಾಸ್ಯೊದ ನೆನೆಪುರ್ದ್ ಪಿದಯಿ ಬನ್ನಗ ತನ್ನಾಲ್ಮೆದ ಪೊರ್ಮ್ಬಾಟೊಡು ಕಡೀರ ಪಟ್ಟಿಡ್ ಬರ್ಪುನ ಪೊರ್ಮ್ಬಾಟ ನಡಪಾಯಿನ ನಮ್ಮ ತುಳುನಾಡ್ ಮಾತ್ರ ದಾಯೆ ನನಲಾ ಆ ದಾಸ್ಯೊದ ಪುದರ್‌ಡ್ ಬದ್‌ಕೊಡಾದ್ ಬೈದ್ಂಡ್ ಪನ್ದ್ ನಮ ಅರ್ಥ ಮಲ್ತೊನೊಡು. ಬ್ರಿಟಿಷೆರ್ ಲೆತ್ತಿನ ಕೆನರಾ ನ್ ಅರ್ಥದಾಂತೆ ಕನ್ನಡ ಪನ್ದ್ ಮಲ್ತ್‌ದ್ ತುಳು ಪಾತೆರುನಕಲೆನ ಜಿಲ್ಲೆಗ್ ಕನ್ನಡೊದ ಪುದೆ ತುಂಬಾದಿನ ಈ ಪುದರ್‌ನ್ ಪಗಪೊಡು ಪನ್ದ್ ತುಳುವೆರ್ ಮಾತಾ ಒಟ್ಟಾವೊಂದುಲ್ಲೆರ್.