ಇಟ್ಟೆಲ್: ಅಪ್ರಾಪ್ತ ಪ್ರಾಯೊದ ಪೊಣ್ಣನ ಮಿತ್ತ್ ಲೈಂಗಿಕ ದೌರ್ಜನ್ಯ: ಬಾಲೆ ಪೆದ್ದಿ ಬೊಕ್ಕ ತೆರಿದ್ ಬತ್ತ್ಂಡ್ ವಿಷಯ: ಕೇರಳ ಮೂಲೊದ ಆಣನ ಮಿತ್ತ್ ಪೋಕ್ಸೋ ಕೇಸ್‌

Last updated on September 25th, 2026 at 10:17 am

ಇಟ್ಟೆಲ್, ಸೆ. 25: ಮೊಬೈಲ್‌ಡ್ ಗುರ್ತ ಆತಿನ ಕೇರಳದ ಆಣ್ ಒರಿ ಅಪ್ರಾಪ್ತ ಪ್ರಾಯೊದ ಪೊಣ್ಣನ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ತಿತ್ತ್‌ದ್, ಆಲ್ ಬಾಲೆ ಪೆದ್ದಿ ಬೊಕ್ಕ  ಈ ನಡಪು ಬೊಲ್ಪುಗು ಬೈದ್ಂಡ್. ಈ ಬಗೆಟ್ ಇಟ್ಟೆಲ್ ಪೊಲೀಸ್ ಸ್ಟೇಶನ್‌‌ಡ್ ಪೋಕ್ಸೋ (POCSO) ಕಾಯ್ದೆದಡಿಟ್ ಶೂನ್ಯ ಎಫ್‌ಐಆರ್’ (Zero FIR) ದಾಕಲಾತ್ಂಡ್.

ಇಲ್ಲಗ್ ಲೆಪ್ಪುಡಾದ್ ದೌರ್ಜನ್ಯ: ಒಯಿಲ್ ಬರೆಪಾದಿನ ಸಂತ್ರಸ್ತೆದಿ ಪೊಣ್ಣಗ್ ಕೇರಳ ರಾಜ್ಯೊದ ನಿವಾಸಿಯಾಯಿನ ಆಣನ ಗುರ್ತ ಆದಿತ್ತ್ಂಡ್. ಇರ್ವೆರ್ಲಾ ಮೊಬೈಲ್‌ಡ್ ಪಾತೆರೊಂದೇ ಇಪ್ಪೆದೆರ್‌ಗೆ.

ಕರಿನ ವರ್ಸ, ಪನ್ಡ ತೇದಿ 21-12-2025 ತಾನಿ ಆಯೆ ಈ ಪೊಣ್ಣನ್ ಆಯನ ಇಲ್ಲಗ್ ಲೆಪ್ಪುಡಾದ್ ಆಲೆನ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ತ್‌ದೆ. ತೇದಿ 08-09-2026 ತಾನಿ ಅಪ್ರಾಪ್ತ ಪೊಣ್ಣನ ಆರೋಗ್ಯಡ್ ಒರರ್ದ್ ಒರಾನೆ ಎಚ್ಚಿಕಮ್ಮಿ ಆದಿತ್ತ್‌ದ್, ಇಲ್ಲದಕುಲು ಮರ್ದ್‌ಗ್ ಆಲೆನ್ ಆಸ್ಪತ್ರೆಗ್ ದಾಕಲ್ತ್‌ದೆರ್. ಮನದಾನಿ, ತೇದಿ 09-09-2026 ತಾನಿ ಪೊಣ್ಣು ಆಸ್ಪತ್ರೆಡೇ ಪೆದ್ದ್‌ದಲ್, ಈ ಪೊರ್ತುಡು ಪೊಣ್ಣನ ಮಿತ್ತ್ ಲೈಂಗಿಕ ದೌರ್ಜನ್ಯ ನಡತಿನವು ಸ್ಪಷ್ಟ ಆತ್ಂಡ್.

ಈ ಬಗೆಟ್ ಇಟ್ಟೆಲ್ ಪೊಲೀಸ್ ಸ್ಟೇಶನ್‌‌ಡ್ ಶೂನ್ಯ ಅ.ಕ್ರ: 01/2026 ದ ಪ್ರಕಾರ ಪೋಕ್ಸೋ ಕಾಯ್ದೆ 2012ತ ಕಲಂ 4, 5(J)(ii), 5(L), 6 ಬೊಕ್ಕ ಭಾರತೀಯ ನ್ಯಾಯ ಸಂಹಿತೆ (BNS) 2023ತ ಕಲಂ 64(2)(m) ಅಡಿಟ್ ಪ್ರಕರಣ ದಾಕಲಾತ್ಂಡ್.

ನಡಪು ನಡತಿನ ಜಾಗೆ ಕೇರಳದ ಸೀಮೆಡ್ ಬರ್ಪಿನೆರ್ದಾವರ, ನನದ ಕಾನೂನು ಕ್ರಮ ಬೊಕ್ಕ ಜಡ್ತೆಗ್ ಪ್ರಕರಣೊನು ನಡಪು ನಡತಿನ ಜಾಗೆದ ಸೀಮೆದ  ಪೊಲೀಸ್ ಸ್ಟೇಶನ್‌ಗ್ ಟ್ರನ್ಸ್‌ಫರ್ ಮಲ್ಪುವ ಪನ್ದ್ ಪೊಲೀಸ್ ಪ್ರಕಟಣೆ ತೆರಿಪಾದ್ಂಡ್.