ಕಂಡನಿ ಬೊಡೆದಿನ ಲಡಯಿಡ್ ಮಗೆ ಬಲಿ: ಕೊಟ್ಟುಡು ಆಕ್‌ದ್ ಮಗನೇ ಕೆರ್ನ ಕೆಂಗುಡೆ ಅಮ್ಮೆ!

Last updated on November 15th, 2026 at 01:19 pm

ತುಮಕೂರು, ನ. 15: ಕೊಟ್ಟುಡು ಆಕ್‌ದ್ ಸ್ವಂತ ಮಗನೇ ಅಮ್ಮೆ ಭೀಕರವಾದ್ ಕೆರ್ತಿನ ಆಘಾತಕಾರಿ ನಡಪು ತುಮಕೂರು ಜಿಲ್ಲೆದ ಕುಣಿಗಲ್ ತಾಲೂಕ್‌ದ ಚೌಡನಾಯಕನಪಾಳ್ಯಡ್  ನಡತ್‌ದ್ಂಡ್. ಕಂಡನೆ ಬೊಡೆದಿನ ನಡುತ ಲಡಯಿಗ್ 16 ವರ್ಸೊದ ಮಗೆ ಸುನೀಲ್ ಬಲಿ ಆದಿತ್ತ್‌ದ್, ಆರೋಪಿನ್ ನಂಜಪ್ಪೆ ಪನ್ದ್ ಗುರ್ತ ಪತ್ತ್‌ದೆರ್. ಮಗನ್ ಕೊಂದ ಕೆರ್ದ್ ಅಲ್ಪನೇ ಕುಲ್ಲುದಿತ್ತಿನ ಆರೋಪಿನ್ ಪೊಲೀಸೆರ್ ಕೈದ್ ಮಲ್ತ್‌ದೆರ್. ನಡಪುಗು ಸಂಬಂಧಿತ್‌ದ್ ಕುಣಿಗಲ್ ಸ್ಟೇಷನ್‌ಡ್ ಪ್ರಕರಣ ದಾಕಲಾತ್ಂಡ್.

ಟ್ಯೂಷನ್‌ಗ್ ಪಿದಡ್ದಿತ್ತಿನ ಸುನೀಲ್
20 ವರ್ಸೊಗು ದುಂಬು ಮದಿಮೆ ಆದಿತ್ತಿನ ಆರೋಪಿ ನಂಜಪ್ಪೆ ಬೊಕ್ಕ ರಂಜಿತಾ ದಂಪತಿಗ್ ಇರ್ವೆರ್ ಜೋಕುಲು ಉಲ್ಲೆರ್, ಕೆಲ ತಿಂಗೊಲುರ್ದಿಂಚಿ ಕಂಡನೆಬೊಡೆದಿನ ನಡುಟು ಲಡಯಿ ಸುರು ಆತ್ಂಡ್. 6 ತಿಂಗೊಲುಗು ದುಂಬುಲಾ ಲಡಯಿ ಆದ್ ಒಯಿಲ್  ದಾಕಲಾದಿತ್ತ್ಂಡ್. ಕಂಡನ್ಯನ ಮಿತ್ತ್ ಬೊಡೆದಿಯೇ ಕೇಸ್ ಕೊರ್ನೆರ್ದಾವರ ನಂಜಪ್ಪೆ ಜೈಲಿಗ್ಲಾ ಪೋದಿತ್ತೆ. ಜೈಲ್‌ರ್ದ್ ಪಿದಯಿ ಬತ್ತಿ ಬೊಕ್ಕ ಬೊಡೆದಿನ ಒಟ್ಟುಗು ರಾಜಿಯಾದ್ ಕುಡ ಸಂಸಾರ ಸುರು ಮಲ್ತಿತ್ತೆರ್. ಈ ನಡುಟು ಇನೌ ಕಾಂಡೆ ದಂಪತಿನ ನಡುಟು ಕುಡ ಲಡಾಯಿ ಆತ್ಂಡ್. ಈ ನಡುಟು ಬೊಡೆದಿ ರಂಜಿತಾನ್ ನಂಜಪ್ಪೆ ಇಲ್ಲರ್ದ್ ಪಿದಯಿ ಪಾಡ್ದೆ. ಕಾಂಡೆ ಟ್ಯೂಷನ್‌ಗ್ ಪಿದಡ್ದಿತ್ತಿನ ಮಗೆ ಸುನೀಲ್ ಇಲ್ಲದ ಬಾಕಿಲ್ ದೆತ್ತಿನೆರ್ದಾವರ, ಆಯಗ್ ನಂಜಪ್ಪೆ ಕೊಟ್ಟುಡು ಆಕ್‌ದೆ. ಗಾತಿದ ಗಡಿಕುಲಾತಿನ ಸುನೀಲ್ ಅಲ್ಪನೇ ತೀರ್ದೆ.

ಮಗನ್ ಅಮ್ಮೆನೇ ಭೀಕರವಾದ್ ಕೆರ್ತಿನೆನ್ ಕಂಡಿಡೆ ತೂತಿನ ರಂಜಿತಾ, ಅಪಗನೇ ನಡಪುಧ ಬಗೆಟ್ ಪೊಲೀಸೆರೆಗ್ ಒಲವು ಕೊರ್ದಿತ್ತ್‌ದ್, ಜಾಗೆಗ್ ಬತ್ತಿನ ಪೊಲೀಸೆರ್ ಮಗನ್ ಕೆರ್ದ್ ಇಲ್ಲಡೇ ಕುಲ್ಲುದಿನ ಆರೋಪಿ ನಂಜಪ್ಪನ್ ಕೈದ್ ಮಲ್ತ್‌ದೆರ್. ಕಾಂಡೆ 6 ಗಂಟೆದ ಅಂದಾಜಿಗ್ ನಡಪು ನಡತ್‌ದ್ಂಡ್‌ಗೆ.

Leave a Reply

Your email address will not be published. Required fields are marked *

Share
error: Content is protected !!