Last updated on June 27th, 2025 at 10:23 am
ಬೆದ್ರ, ಜೂ. 27 : 2024 ತ ನವೆಂಬರ್ ತಿಂಗೊಲುಡು ನಡತಿನ ಎಡ್ತೆದ ಪ್ರಕರಣೊಡು ಬಸ್ದ ದನಿಟ ಕಾನೂನು ಬಾಹಿರವಾದ್ ಕಾಸ್ ಪೀಂಕಾದ್, ಎಡ್ತೆಡ್ ಗಡಿಕುಲಾತಿನಕಲೆಗ್ ಪರಿಹಾರ ಕೊರ್ತಿನ ಆರೋಪಡ್ ಹಿಂದೂ ಜಾಗರಣ ವೇದಿಕೆದ ಜಿಲ್ಲಾ ಸಹ ಸಂಚಾಲಕೆ ಸಮಿತ್ರಾಜ್ ಧರೆಗುಡ್ಡೆ ಮೆರೆನ್ ಬೆದ್ರ ಪೊಲೀಸೆರ್ ಗುರುವಾರ ಅರೆಸ್ಟ್ ಮಲ್ತ್ದೆರ್.
2024ತ ನವೆಂಬರ್ 11ತಾನಿ ಪ್ರೈವೇಟ್ ಬಸ್ ಒಂಜಿ ಮೈಟ್ ಎಂಜಿನಿಯರಿಂಗ್ ಕಾಲೇಜ್ದ ಎದುರುದ ರೋಡ್ಡ್ ಸ್ಕೂಟರ್ಗ್ ಎಡ್ತ್ದ್ ಇರ್ವೆರೆಗ್ ಗಡಿಕುಲಾದಿತ್ತ್ದ್, ಅವೆಟ್ ಒರಿಯಗ್ ಗಾತಿದ ಗಡಿಕುಲಾದಿತ್ತ್ಂಡ್. ವಿದ್ಯಾರ್ಥಿಲು ಬೊಕ್ಕ ಸಾರ್ವಜನಿಕೆರ್ ಜಾಗೆಡ್ ಒಟ್ಟು ಸೇರ್ದ್ ಬೇತೆ ಗಾಡಿಲು ಪೋವಂದಿಲೆಕ ಅಡ್ಡಕಟ್ಟ್ದಿತ್ತೆರ್. ಈ ಪೊರ್ತುಡು ಜಾಗೆಡಿತ್ತಿನ ಸಮಿತ್ ರಾಜ್, ದನಿ ರಫೀಕ್ನ ಕೈರ್ದ್ ಪೆಟ್ಟಾತಿನಕಲೆಗ್ ₹ 5 ಲಕ್ಷ ಕೊರ್ಪಾದಿತ್ತೆರ್.
“ಸಮಿತ್ ರಾಜ್ ಎನ್ನ ಕೈರ್ದ್ ಒತ್ತಾಯೊಡು ₹ 5 ಲಕ್ಷ ಪರಿಹಾರ ಕೊರ್ಪಾದೆರ್. ಉಂದು ಕಾನೂನುಗು ವಿರುದ್ಧ ಆದುಂಡು, ಆರೆನ ಮಿತ್ತ್ ಕಾನೂನು ಕ್ರಮ ಗೆತೊನೊಡು” ಪನ್ದ್ ಒಂತೆ ದಿನೊಕು ದುಂಬು ಬೆದ್ರ ಪೊಲೀಸೆರೆಡ ಬಸ್ದ ದನಿ ರಫೀಕ್ ಒಯಿಲ್ ಬರೆಪಾದೆರ್. ಆರೋಪಿ ಸಮಿತ್ ರಾಜ್ನ್ ಪೊಲೀಸೆರ್ ಅರೆಸ್ಟ್ ಮಲ್ತ್ದ್, ಕೋರ್ಟ್ಗ್ ಹಾಜಿರಿ ಮಲ್ತಿತ್ತ್ದ್, ನ್ಯಾಯಾಂಗ ಬಂಧನೊಗು ಒಪ್ಯಾದೆರ್.