Last updated on July 27th, 2025 at 08:13 am
ಬೆಂಗಳೂರು, ಜು 27: ಒಂಜೇ ಇಲ್ಲದ ಮೂವೆರ್ ಜೋಕುಲೆಗ್ ಅಕ್ಲೆನನೇ ಸಿದ್ಯಮ್ಮೆ ಕರ್ಬದ ರಾಡ್ಡ್ ಸೈಪುಲೆಕ ಆಕ್ದಿನ ನಡಕೆ ನಡತಿತ್ತ್ದ್, ಅವೆಟ್ ಇರ್ವೆರ್ ಜೋಕುಲು ಪೆರಣ ಬುಡ್ಯೆರ್ನ್ಡ ಕುಡೊರಿ ಗಾತಿದ ಸ್ಥಿತಿಟ್ ಆಸ್ಪತ್ರೆಡ್ ಇತ್ತೆನಾ ಬೊಕ್ಕನಾ ಪನ್ದ್ ಬಂಙ ಬರೊಂದುಲ್ಲೆ.
ಖಾಸೀಂ(35) ಕೇರ್ತಿನ ಆರೋಪಿ. ಚಾಂದ್ ಪಾಶಾ ಪನ್ಪಿನಾರೆನ 9 ಬೊಕ್ಕ 7 ವರ್ಸ ಪ್ರಾಯೊದ ಇರ್ವೆರ್ ಆಣ್ ಜೋಕುಲು ಪೆಟ್ಟ್ ತಿನ್ದ್ದ್ ತೀರ್ದೆರ್. 5 ವರ್ಸೊದ ಆಣ್ ಬಾಲೆಗ್ ಗಾತಿದ ಪೆಟ್ಟಾದಿತ್ತ್ದ್, ಆಸ್ಪತ್ರೆಗ್ ದಾಕಲ್ತ್ದೆರ್.
ಯಾದಗಿರಿತ ಕುರುಕುಂದ ಗ್ರಾಮೊದ ಚಾಂದ್ ಪಾಶಾ ಬೊಕ್ಕ ಇಲ್ಲದಕುಲು ಐನ್ ವರ್ಸೊಗು ದುಂಬು ಬೆಂಗಳೂರ್ಗ್ ಬತ್ತ್ದ್ ಸಾರ್ನೆದ ಬೇಲೆ ಮಲ್ತೊಂದಿತ್ತೆರ್. ಪಲಯೆ – ಅತ್ತಿಗೆ ಬೇಲೆಗ್ ಪೋದುಪ್ಪುನಗ ಇಲ್ಲಡಿತ್ತಿನ ಜೋಕುಲೆನ ಮಿತ್ತ್ ಸಿದ್ಯಮ್ಮೆ ಖಾಸಿಂ ಸಮ ಪೆಟ್ಟ್ ಪಾಡ್ದೆ.
ನಡಕೆ ನಡತಿನ ಪೊರ್ತುಡು ಜೋಕುಲೆನ ಅಪ್ಪೆಅಮ್ಮೆ ಬೇಲೆಗ್ ಪೋದಿತ್ತೆರ್. ನಟ್ಟಿಕಾಯಿ ಕನಯೆರ ಮಾರ್ಕೆಟ್ಗ್ ಪೋದಿತ್ತಿನ ಅಜ್ಜಿ ಪಿರಬತ್ತ್ದ್ ತೂನಗ ನೆತ್ತೆರ್ದ ಮಡುಟು ಬೂರ್ದಿನ ಜೋಕುಲೆನ್ ತೂತೆರ್. ನಡಕೆಗ್ ಪತ್ತ ನೆವನ ತೆರಿದ್ ಬೈದಿಜಿಂಡಲಾ, ಖಾಸಿಂ ಕೆಲ ದಿನೊರ್ದಿಂಚಿ ಮಂಡೆ ಸಮ ದಾಂತಿನಕ್ಲೆ ಲೆಕ ಇತ್ತೆಗೆ. ಈ ಬಗೆಟ್ ಹೆಬ್ಬಗೋಡಿ ಪೊಲೀಸೆರ್ ಪ್ರಕರಣ ದಾಕಲ್ತೊಂದು, ಜಡ್ತೆ ಮಲ್ತೊಂದುಲ್ಲೆರ್. ಆರೋಪಿ ಖಾಸಿಂನ್ ಕೈದ್ ಮಲ್ದೆರ್.