Last updated on September 9th, 2025 at 12:49 pm
ಕುಡ್ಲ: ಕುಡ್ಲಡ್ ಜಪ್ಪೊಡಿತ್ತಿನ ಒಟ್ಟು 4 ವಿಮಾನೊಲೆಗ್ ಲ್ಯಾಂಡಿಂಗ್ ಮಲ್ಪೆರಾವಂದೆ ಬಾನೊಡೇ ತಿರ್ಗ್ದ್ ಪೋದು ಬೆಂಗಳೂರ್ಡ್ ಲ್ಯಾಂಡಿಂಗ್ ಆತಿನ ನಡಕೆ, ಕೋಡೆ ಸೋಮಾರ ಕಾಂಡೆ ನಡತ್ದ್ಂಡ್.
ಅಬುಧಾಬಿ ರ್ದ್ ಕಾಂಡೆ 4.25ಕ್ಕ್ ಕುಡ್ಲಗ್ ಬರೊಡಿತ್ತಿನ ಏರ್ ಇಂಡಿಯಾ ವಿಮಾನೊಗು ಲ್ಯಾಂಡಿಂಗ್ ಮಲ್ಪೆರಾವಂದೆ ಅವು ಬೆಂಗಳೂರುಗ್ ಪೋತುಂಡು. ಅವೆಟಿತ್ತಿನ ಪ್ರಯಾಣಿಕೆರೆನ್ ಕುಡೊಂಜಿ ವಿಮಾನೊಡು ಒಂತೆ ತೈರ್ದ್ 10.20ದ ಅಂದಾಜಿಗ್ ಕುಡ್ಲಗ್ ಪಿರ ಲೆತೊಂದು ಬತ್ತ್ದೆರ್. ದುಬಾೖರ್ದ್ ಬತ್ತ್ದ್ ಕುಡ್ಲಡ್ ಜಪ್ಪೊಡಿತ್ತಿನ ವಿಮಾನೊಲಾ ಕಾಂಡೆ ಲ್ಯಾಂಡಿಂಗ್ ಮಲ್ಪೆರಾವಂದೆ ಬೆಂಗಳೂರ್ಗ್ ಪೋತುಂಡು. ಬೊಕ್ಕ ಈ ವಿಮಾನ ಮಧ್ಯಾಹ್ನ 1.05ತ ಅಂದಾಜಿಗ್ ಕುಡ್ಲಗ್ ಪಿರ ಬೈದ್ಂಡ್.
ಹೈದರಾಬಾದ್ ವಿಮಾನ ಕ್ಯಾನ್ಸಲ್!
ಬಹರೈನ್ರ್ದ್ ಬತ್ತ್ದ್ ಕಾಂಡೆ 7.40ಗ್ ಕುಡ್ಲಡ್ ಜಪ್ಪೊಡಿತ್ತಿನ ವಿಮಾನೊಲಾ ಲ್ಯಾಂಡಿಂಗ್ ಆವಂದೆ ಬೆಂಗಳೂರ್ಗ್ ಪೋದಿತ್ತ್ಂಡ್. ಬೊಕ್ಕ ಈ ವಿಮಾನ ಮಧ್ಯಾಹ್ನ 12ತ ಅಂದಾಜಿಗ್ ಕುಡ್ಲಗ್ ಪಿರ ಬೈದ್ಂಡ್. ಈ ನಡುಟು ಕುಡ್ಲರ್ದ್ ಹೈದರಾಬಾದ್ ಪೋವೊಡಿತ್ತಿನ ವಿಮಾನ ಸಂಚಾರನೇ ಕ್ಯಾನ್ಸಲ್ ಆತ್ಂಡ್. ಮುಂಬೈರ್ದ್ 7.30ಕ್ಕ್ ಬರೊಡಿತ್ತಿನ ಏರ್ಇಂಡಿಯಾ ಎಕ್ಸ್ಪ್ರೆಸ್ ಕಡೆಸ್ಸ್ದ್ (9.10) ಕುಡ್ಲಡ್ ಲ್ಯಾಂಡ್ ಆತ್ಂಡ್.
ಒಲ್ತೊಲ್ತು ಪ್ರಯಾಣಿಕೆರ್ ಬರ್ಪೆರ್ ಪನ್ದ್ ಏರ್ಪೋರ್ಟ್ದ ಪಿದಯಿ ಕಾತೊಂದಿತ್ತಿನಕುಲು ವಿಮಾನ ಡೈವರ್ಟ್ ರ್ದಾವರ ಮೋನೆ ಎಲ್ಯೆ ಮಲ್ತ್ ಕುಲ್ಲೊಡಾಂಡ್. ಅಂಚೆನೇ ಮಂಡೆಬೆಚ್ಚಡ್ ಪಾಕ ಪೊರ್ತು ಕಾಪೊಡಾದ್ ಬತ್ತ್ಂಡ್.
ನೆವನ ದಾದ?
ಕಾಂಡೆ ಬಾರೀ ಮೈಂದ್ ಇತ್ತಿನೆರ್ದಾವರ ಕಾಂಡೆದ ಪೊರ್ತುಡು ಕುಡ್ಲಡ್ ವಿಮಾನ ಜಪ್ಪಾಯೆರ ಪೈಲೆಟ್ಲೆಗ್ ರನ್ವೇ ಸಮ ತೋಜುಜಿ. ಇಂಚ ಸಮ ತೋಜಂದಿನಪಗ ವಿಮಾನ ಲ್ಯಾಂಡಿಂಗ್ ಮಲ್ಪುನ ಬುಡ್ದು ಮುಟ್ಟದ ವಿಮಾನ ಉಂತಡೆಗ್ ಡೈವರ್ಟ್ ಮಲ್ಪುವೆರ್.
ಬೆಂಗಳೂರ್ರ್ದ್ ಬತ್ತ್ದ್ ಪಿರ ಬೆಂಗಳೂರ್ಗ್!
ಬೆಂಗಳೂರ್ರ್ದ್ ಬತ್ತ್ದ್ ಕಾಂಡೆ 6.55ಕ್ ಕುಡ್ಲಡ್ ಲ್ಯಾಂಡಿಂಗ್ ಆವೊಡಿತ್ತಿನ ಇಂಡಿಗೋ ವಿಮಾನಲಾ ಹವಾಮಾನ ವೈಪರಿತ್ಯೊದ ನೆವನೊಡು ಬಾನೊಡೇ ಸುತ್ತು ಪಾಡ್ದ್ ಲ್ಯಾಂಡಿಂಗ್ ಮಲ್ಪೆರಾವಂದೆ ತಿರ್ಗ್ದ್ ಬೆಂಗಳೂರ್ಗ್ ಪೋದಿತ್ತ್ಂಡ್. ಬೊಕ್ಕ 10.40ದ ಅಂದಾಜಿಗ್ ಈ ವಿಮಾನ ಕುಡ್ಲಗ್ ಬತ್ತ್ದ್ಂಡ್. ಆತ್ನೇಟ ಪ್ರಯಾಣಿಕೆರ್ ಕಾತ್ ಕಾತ್ ದ್ ಸುಣ್ಣ ಆಯೆರ್.