Last updated on October 27th, 2025 at 09:16 am
ಬೆಂಗಳೂರು, ಅ. 26: ಚಿತ್ತಾಪುರ ಆರ್ಎಸ್ಎಸ್ ಪಥಸಂಚಲನ ಪ್ರಕರಣೊಗು ಸಂಬಂಧಿತ್ದ್ ಪ್ರಿಯಾಂಕ್ ಖರ್ಗೆ v/s ಆರ್ಎಸ್ಎಸ್ ನಾಯಕೆರೆ ನಡುಟು ಪಾತೆರೊಗು ಪಾತೆರ ಬುಲೆಯೊಂದೇ ಉಂಡು. ರಾಷ್ಟ್ರೀಯ ಸ್ವಯಂಸೇವಕ ಸಂಘ (RSS)ದ 100ನೇ ವಾರ್ಷಿಕೋತ್ಸವೊದ ಲೆಕ್ಕೊಡು ನಡಪುನ ಪಥಸಂಚಲನ ನಡಪಾದೇ ನಡಪಾವ ಪನ್ಪಿನ ಆರ್ಎಸ್ಎಸ್ ಮುಖಂಡೆರೆ ವಿರುದ್ಧ ಗ್ರಾಮೀಣಾಭಿವೃದ್ಧಿ ಸಚಿವೆ ಪ್ರಿಯಾಂಕ್ ಖರ್ಗೆ ಬಾರೀ ಆಕ್ಷೇಪ ತೂಪಾದೆರ್.
ಮಾಧ್ಯಮೊದಕ್ಲೆಡ ಪಾತೆರ್ನ ಖರ್ಗೆ, ಕಲ್ಲಡ್ಕ ಪ್ರಭಾಕರ್ ಭಟ್ ಏರ್? ಕೋರ್ಟ್ರ್ದ್ ಆರ್ ಮಲ್ಲೆನಾ? ಮಲ್ಪಡ್ ತೂಕ. ಕೋರ್ಟ್ದ ಅನುದಾಂತೆ ಮಲ್ಪುವೆರಾ? ಅನುದಾಂತೆ ಮಲ್ತ್ಂಡ ಸರ್ಕಾರ ಮನಿಪಂದೆ ಇಪ್ಪುಂಡಾ? ಅನು ಗೆತೊಂದೇ ಮಲ್ಪೊಡು. ಕಲ್ಲಡ್ಕ ಪ್ರಭಾಕರ್ ಭಟ್ ಆವಡ್ ಆರೆನ ಅಮ್ಮೆ ಆವಡ್ ಕಾನೂನು ಮಾತೆರೆಗ್ಲಾ ಒಂಜೇ ಪನ್ದ್ ವಾಗ್ದಾಳಿ ಮಲ್ತ್ದೆರ್.
ಬಹಿರಂಗ ಚರ್ಚೆಗ್ ಬಲೆ ಪನ್ಡಲಾ ಚರ್ಚೆಗ್ ಬರ್ಪುಜೆರ್. ದಾದಾಂಡಲಾ ಕಂಟೆಂಟ್ ಇತ್ತ್ಂಡ ಬರ್ಪೆದೆರ್. ಕಾಲಿ ವೈಯಕ್ತಿಕವಾದ್ ಪಾತೆರುವೆರ್. ಆರ್ಎಸ್ಎಸ್ ರಿಜಿಸ್ಟರ್ ಆತ್ಂಡಾ ಪನ್ದ್ ಕೇನ್ಡ ತಪ್ಪಾ? ದಾಕಲೆ ಕನತ್ದ್ ಮೋನೆಗ್ ದಕ್ಕಡ್. ಮೊಕಲೆಗ್ ಕಾಸ್ ಒಲ್ತು ಬರ್ಪುಂಡು? ದೇಲಂತಡೆದ ಕಾಣಿಗೆ ಡಬ್ಬಿ ಲಾಕ್ ಆದುಪ್ಪುಂಡು. ಅವೆನ್ ದೆಪ್ಪೊಡಾಂಡ ತಹಶೀಲ್ದಾರ್ ಬರೊಡು, ಮಾತೆನ್ಲಾ ಪಾರದರ್ಶಕವಾದ್ ಮಲ್ಪುವೆರ್. ಆಂಡ ಆರ್ಎಸ್ಎಸ್ಗ್ ಒಲ್ಪರ್ದ್ ಕಾಸ್ ಬರೊಂದುಂಡು. ಅವೆತ ಮೂಲ ಗೊತ್ತಾವೊಡತ? ರಾಜ್ಯ, ದೇಶ, ವಿದೇಶೊರ್ದು ಬರೊಂದುಂಡಾ? ಉಂದೆತ ಮೂಲ ಗೊತ್ತಾವೊಡತ? ದೇಶೊದ ಮಾಮಲ್ಲ ಎನ್ಜಿಓ ಪನ್ದ್ ಮೋದಿ ಪನ್ಪೆರತಾ? ಅವೆತ ಲೆಕ್ಕನ್ ಇತ್ತೆ ಕೊರಡ್. ಸರ್ದಾರ್ ವಲ್ಲಬಾಯ್ ಪಟೇಲ್ರೆರ್ದ್ ಪತ್ತ್ದ್ ಇಂದಿರಾಗಾಂಧಿ ಮುಟ್ಟ ಎಂಕ್ಲ ಮಲ್ಲ ಮನಸ್ ಮಲ್ತೊಂದು ಬತ್ತ್ದ, ಅವ್ವೇ ತಪ್ಪಾತ್ಂಡ್ ಪನ್ದ್ ಪಿಸ್ರ್ಡ್ ಪಾತೆರ್ಯೆರ್.