Last updated on April 26th, 2026 at 06:59 am
ಶಿರಸಿ, ಏ. 26: ಮದಿಮೆ ಆವರೆ ನನ ದಾನೆ ಒಂತೆ ಪೊರ್ತು ಇಪ್ಪುನಗ ಮದಿಮಲ್ ನಾಪತ್ತೆ ಆತಿನ ನಡಕೆ ಉತ್ತರ ಕನ್ನಡ ಜಿಲ್ಲೆದ ಶಿರಸಿ ಪೇಂಟೆಡ್ ಕೋಡೆ ನಡತ್ದ್ಂಡ್.
ಸೀಫಾ ಖಾನ್ ನಾಪತ್ತೆ ಆತಿನ ಪೊಣ್ಣು. ಮುಲ್ಪದ ಉಸರಿ ಸಾದಿದ ಕಲ್ಯಾಣ ಮಂಟಪೊಡು ಕೋಡೆ ಮಧ್ಯಾಹ್ನ ಮೋಲೆನ ಮದಿಮೆ ಆವೊಡಿತ್ತ್ಂಡ್. ಮದಿಮೆದ ಕಾರ್ಯೊಲೆಡ್ ಇಲ್ಲದಕುಲು ಬಿನ್ನೆರ್ ದೋಸ್ತಿಯರ್ಲು ಮಾತ ಸಕ್ರಿಯವಾದ್ ಇಪ್ಪುನಗ ಈ ಅನಿರೀಕ್ಷಿತ ನಡಕೆ ನಡತ್ದ್ಂಡ್. ಮದಿಮೆಗ್ ದುಂಬು ಮದಿಮಲೆನ ಐತ ಮಲ್ಪೆರ ಇಲ್ಲದಕುಲು ಆಲೆನ ಅದೆಕ್ ಪೋನಗ ಪೊಣ್ಣು ನಾಪತ್ತೆ ಆತಿನ ತೆರಿದ್ ಬೈದ್ಂಡ್. ಅಪಗನೇ ಇಲ್ಲದಕುಲು ಕಲ್ಯಾಣ ಮಂಟಪೊದ ಸುತ್ತಮುತ್ತ, ಸಂಬಂಧಿಕೆರೆನ ಇಲ್ಲ್ ಬೊಕ್ಕ ಗುರ್ತದಕೊಲೆನ ಜಾಗೆಲೆಡ್ ಏತ್ ನಾಡ್ಂಡಲ ಒವ್ವೇ ಒಲವು ತಿಕ್ಕ್ದಿಜಿ. ಕುಸಿಟ್ ಇತ್ತಿನ ಇಲ್ಲಗ್ ಇತ್ತೆ ತೆಡಿಲ್ ಆಕಿಲೆಕ ಆತ್ಂಡ್.
ಮೂಲೊಲೆನ ಪ್ರಕಾರ, ಸೀಫಾ ಖಾನ್ ದುಂಬು ಎಂಬಿಬಿಎಸ್ (MBBS) ಕಲ್ತೊಂದುಪ್ಪುನಗ ಒರಿ ಜವನನ್ ಮೋಕೆ ಮಲ್ತೊಂದಿತ್ತಲ್ಗೆ . ಆಂಡ, ಈ ಪ್ರೇಮ ಸಂಬಂಧೊಗು ಇಲ್ಲದಕಲೆನ ವಿರೋಧ ಇತ್ತ್ಂಡ್. ಅಂಚಾದ್ ಕೋಡೆ ಬೇತೆ ಆಣಗ್ ಮದಿಮೆ ಮಲ್ತ್ ಕೊರ್ರ ಅಟ್ಟನೆ ಮಲ್ತ್ದೆರ್. ಅಂಚಾದೇ ಪೊಣ್ಣು ಮದಿಮೆಗ್ ಒಂತೆ ಪೊರ್ತು ದುಂಬು ಚಂಗಾಯಿನೊಟ್ಟುಗು ಪೋದುಪ್ಪೊಡು ಪನ್ಪಿ ಶಂಕೆ ಉಂಡಾತ್ಂಡ್.
ಈ ಬಗೆಟ್ ಪೊಣ್ಣನ ಅಮ್ಮೆ ಝಹೀರ್ ಖಾನ್ ಮೇರ್ ಶಿರಸಿದ ಹೊಸ ಮಾರುಕಟ್ಟೆ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಪೋಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.