ಮುಲ್ಕಿ: ತುಳುವರ್ಲ್ಡ್ ಫೌಂಡೇಶನ್ ಕಟೀಲ್ ಬೊಕ್ಕ ತುಳುವ ಮಹಾಸಭೆ ಮುಲ್ಕಿ ವಲಯೊದ ಒತ್ತು ಸೇರಿಗೆಡ್ ತುಳುನಾಡ ಗೀತೆ ದಿನಾಚರಣೆ ಬೊಕ್ಕ ಕಸ್ತೂರಿ ಪಂಜ ಮೆರೆಗ್ “ತುಳು ಅಪ್ಪೆ ಸಿರಿ” ರಾಷ್ಟ್ರೀಯ ಪುಗಾರ್ತೆದ ಮಾನಾದಿಗೆ

Last updated on July 29th, 2026 at 02:14 pm

ಮುಲ್ಕಿ, ಜು. 29: ತುಳುವರ್ಲ್ಡ್ ಫೌಂಡೇಶನ್ ಕಟೀಲ್ ಬೊಕ್ಕ ತುಳುವ ಮಹಾಸಭೆ ಮುಲ್ಕಿ ವಲಯೊದ ಒತ್ತು ಸೇರಿಗೆಡ್, ಮುಲ್ಕಿದ ಸರಕಾರಿ ಪದವಿ ಪೂರ್ವ ಕಾಲೇಜ್‌ಡ್ ತಾರೀಕ್ 28 ಜುಲೈ 2026ಗ್ “ತುಳುನಾಡ ಗೀತೆ ದಿನಾಚರಣೆದ” ಲೇಸ್ ನಡತ್ಂಡ್.

ಈ ಲೇಸ್‌ದ ಗುರ್ಕಾರ್ಮೆನ್ ತುಳುವರ್ಲ್ಡ್ ಫೌಂಡೇಶನ್‌ದ ಗುರ್ಕಾರ್ದಿಯಾಯಿನ ಶ್ರೀಮತಿ ಭಾನುಮತಿ ಶೆಟ್ಟಿ ಕಕ್ವಗುತ್ತು ವೈಸೊಂದಿತ್ತೆರ್. ತುಳುನಾಡ್, ತುಳು ಭಾಷೆದ ಸಂಘರ್ಷೊದ ತಾದಿ, ಇತಿಹಾಸ ಅಂಚೆನೆ ತುಳುಕಾದ್ ನನ ನಡಪೊಡಾಯಿನ ಕಜ್ಜ, ಬೊಕ್ಕ ತುಳುವೆರೆನ ಜವಾಬ್ದಾರಿದ ಬಗೆಟ್ ಡಾ||ವಾಸುದೇವ ಬೆಳ್ಳೆ, ಪ್ರಾಂಶುಪಾಲೆರ್, ಸರಕಾರಿ ಪದವಿ ಪೂರ್ವಕಾಲೇಜ್ ಮುಲ್ಕಿ ಮೇರ್ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ಶ್ರೀ ಮೋಹನಪ್ಪ ತಿಂಗಳಾಯ ಮೇರ್ ಬರೆತಿನ ತುಳುನಾಡ ಗೀತೆನ್ ಶ್ರೀ ಪ್ರಮೋದ್ ಸಪ್ರೆ ಮೇರ್ ಸುಶ್ರಾವ್ಯವಾದ್ ಸಂಯೋಜನೆ ಮಲ್ತ್ ಪದ ಪನ್ಡೆರ್. ತುಳುವರ್ಲ್ಡ್ ಫೌಂಡೇಶನ್‌ದ ಬಗೆಟ್ ಎಲ್ಯ ಪೊಲಬುನು ಶ್ರೀ ವಸಂತ ರೈ ಕುತ್ತೆತ್ತೂರು, ಪ್ರಧಾನ ಕಾರ್ಯದರ್ಶಿ ತುಳುವರ್ಲ್ಡ್ ಫೌಂಡೇಶನ್  ಕೊರಿಯೆರ್. ಈ ಪೊರ್ತುಡು ಶ್ರೀಮತಿ ಕಸ್ತೂರಿ ಪಂಜ ಮೆರೆಗ್  “ತುಳು ಅಪ್ಪೆ ಸಿರಿ” ರಾಷ್ಟ್ರೀಯ ಪುಗಾರ್ತೆದ ಮಾನಾದಿಗೆ ನಡತ್ಂಡ್.  ಕಾಲೇಜು ಅಭಿವೃದ್ಧಿ ಸಮಿತಿದ ಉಪಾಧ್ಯಕ್ಷೆರಾಯಿನ ಶ್ರೀ ಅಶೋಕ್ ಕುಮಾರ್ ಶೆಟ್ಟಿ ಮೇರ್ ಲೇಸ್‌ಗ್ ಎಡ್ಡೆಪ್ಪು ಬಯಕಿಯೆರ್. ವೇದಿಕೆಡ್ ಪ್ರೌಢಶಾಲಾ ವಿಭಾಗದ ಮುಖ್ಯಸ್ಥೆರಾಯಿನ ಜಯಲಕ್ಷ್ಮಿ ಟಿ.ನಾಯಕ್ ಮೇರ್‌ಲಾ ಇತ್ತೆರ್. ತುಳುವ ಮಹಾಸಭೆ ಕೇಂದ್ರೀಯ ಸಮಿತಿದ ಸಂಚಾಲಕೆರಾಯಿನ ಶ್ರೀ ಅರವಿಂದ ಬೆಲ್ಚಡ ಮೇರ್ ಬತ್ತಿ ಬಿನ್ನೆರೆನ್ ಎದ್ಕೊನಿಯೆರ್. ತುಳುವ ಮಹಾಸಭೆ ಮುಲ್ಕಿ ವಲಯದ ಪ್ರಧಾನ ಸಂಚಾಲಕೆರಾಯಿನ ಮಹಿ ಮುಲ್ಕಿ ಕಾರ್ಯಕ್ರಮ ನಿರ್ವಹಣೆ ಮಲ್ತೆರ್. ಲೇಸ್‌ಡ್ ಮುಲ್ಕಿದ ಶ್ರಿ ಹರ್ಷರಾಜ್ ಶೆಟ್ಟಿ, ಶ್ರೀಮತಿ ಸರೋಜಿನಿ ಸುವರ್ಣ, ಶ್ರೀ ಜಯಪಾಲ್ ಶೆಟ್ಟಿ ಐಕಳ, ಶ್ರೀಮತಿ ಲತಾ ಶೇಖರ್, ಶ್ರೀ ಪ್ರಶಾಂತ್ ಶೆಟ್ಟಿ, ಶ್ರೀ ದಿನೇಶ್ ಶೆಟ್ಟಿ, ಶ್ರೀ ಶಂಕರ್ ಪಡಂಗ, ಶ್ರೀಮತಿ ಲೀಲಾ ಬಂಜನ್, ಶ್ರೀ ನಿಶ್ಚಿತ್ ರಾಮಕುಂಜ ಇಂಚಿನ ಗಣ್ಯೆರ್ ಇತ್ತೆರ್.