6 ನಾಯಿದ ಕಿನ್ನಿಲೆನ್ ಆಕ್‌ದ್, ಪೆಟ್ರೋಲ್ ಮೈತ್‌ದ್ ಜೂವೊಪ್ಪ ಪೊತ್ತಾಯಿನ ಕೆಂಗುಡ ಜೋಕುಲು

Last updated on November 17th, 2026 at 02:10 pm

ಅಂಬಿಕಾಪುರ(ಛತ್ತೀಸ್‌ಗಢ): ಛತ್ತೀಸ್‌ಗಢದ ಅಂಬಿಕಾಪುರಡ್ ಪ್ರಾಣಿ ಹಿಂಸೆದ ಕರ್ಲ್ ಚುರ್ರ್ ಪನ್ಪಿನಂಚಿನ ನಡಪು ಒಂಜಿ ಬೊಲ್ಪುಗು ಬೈದಿತ್ತ್‌ದ್, ಕೆಲ ಅಪ್ರಾಪ್ತ ಆಣ್ ಜೋಕುಲು 6 ನಾಯಿದ ಕಿನ್ನಿಲೆಗ್ ಕಣ್ಣ್‌ಡ್ ನೆತ್ತೆರ್‌ದಾಂತಿನಕಲೆ ಲೆಕ ತಾರಾಮರ ಆಕ್‌ದ್, ಪೆಟ್ರೋಲ್ ಮೈತ್‌ದ್ ಸೂ ಕೊರ್ದು ಜೂವೊಪ್ಪ ಪೊತ್ತಾದ್ ಪಾಡ್ದೆರ್. ಪೇಂಟೆದ ಪಂಜಾಬ್ ಗಾರ್ಡನ್‌ದ ಪಿರವುಡು ಈ ಅಮಾನವೀಯ ನಡಪು ನಡತ್‌ದ್ಂಡ್.

ಈ ನಡಪುದ ಸಿಸಿಟಿವಿ ದೃಶ್ಯಾವಳಿಲು ಸಾಮಾಜಿಕ ಬಲೆತ್ತಾನೊಡು ವೈರಲ್ ಆಯಿ ಬೊಕ್ಕ ಪ್ರಕರಣ ಬೊಲ್ಪುಗು ಬೈದ್ಂಡ್. ವೈರಲ್ ಆತಿನ ವಿಡಿಯೋಡ್ ಆಣುಲು ನಾಯಿದ ಕಿನ್ನಿಲೆಗ್ ಸೂ ಕೊರ್ಪುನ ದೃಶ್ಯ ತೋಜೊಂದಿತ್ತ್‌ದ್, ಕಿನ್ನಿಲು ಆ ಸೂಟ್ ಬೆಯ್ಯೊಂದುಪ್ಪುನಗ ಆಣುಲು ರಕ್ಕಸೆರೆಲೆಕ ಕಲ್ಕೊಂದು ಕುಸಿ ಪಡೆಪುನ ತೋಜುಂಡು.

ನಡಪುಗು ಸಂಬಂಧಿತ್‌ದ್ ‘ಬೇಜುಬಾನ್ ಡಾಗ್ ಶೆಲ್ಟರ್’ ಸಂಸ್ಥೆ ಗಾಂಧಿನಗರ ಪೊಲೀಸ್ ಸ್ಟೇಶನ್‌ಡ್ ಒಯಿಲ್ ಬರೆಪಾದಿತ್ತ್‌ದ್, 6 ನಾಯಿದ ಕಿನ್ನಿಲೆನ್ ಕೆರ್ತಿನಕಲೆನ ಮಿತ್ತ್ ಕಠಿಣ ಕ್ರಮ ಗೆತೊನರೆ ಒತ್ತಾಯ ಮಲ್ದ್ಂಡ್. ಈ ವಿಡಿಯೋ ಸಾರ್ವಜನಿಕೆರೆಡ ಬಾರೀ ಆಕ್ರೋಶಗ್ ನೆವನ ಆದಿತ್ತ್‌ದ್, ದೇಶೊಡು ಪ್ರಾಣಿ ಹಿಂಸೆ ತಡೆ ಕಾನೂನುಲೆನ್ ನನಲಾತ್ ಗಟ್ಟಿಮಲ್ಪುನ ಅಂಚೆನೇ ಮುರ್ಗೊಲೆನ ರಕ್ಷಣೆಗ್ ಬೋಡಾಪಿನ ಕ್ರಮ ಗೆತೊನುನ ಅಗತ್ಯತೆನ್ ಲೆತ್ತ್ ಪನೊಂದುಂಡು.

Leave a Reply

Your email address will not be published. Required fields are marked *

Share
error: Content is protected !!