Last updated on January 31st, 2024 at 05:46 pm
ವಾರಾಣಸಿ: ಜ್ಞಾನವಾಪಿ ಪಲ್ಲಿದ ಸೀಲ್ ಮಲ್ದಿನ ನೆಲಮಾಲಿಡ್ ಹಿಂದೂಲೆಗ್ ಪೂಜೆ ಮನ್ಪೆರ ವಾರಾಣಸಿದ ನ್ಯಾಯಂತಡೆ ಬುಧವಾರ ಅವಕಾಶ ಕೊರ್ದು ತೀರ್ಪು ಪ್ರಕಟ ಮಲ್ದ್ಂಡ್.
ನನ ಕಾಲಿ 7 ದಿನೊಟು ಪಲ್ಲಿದ ತಿರ್ತ್ ಇಪ್ಪುನ 10 ಸೀಲ್ ಆತಿನ ನೆಲಮಾಲಿಗೆಡ್ ಹಿಂದೂ ಪೂಜೆಲು ಸುರು ಆವರೆಗುಲ್ಲ. ಅಂಚೆನೇ ಅವೆಕ್ ಬೋಡಾಪಿನ ಮಾತಾ ವೆವಸ್ಥೆಲೆನ್ ಮನ್ಪೆರ ಕೋರ್ಟ್ ಜಿಲ್ಲಾಡಳಿತೊಗು ಸೂಚನೆ ಕೊರ್ತುಂಡು.
ಈ ಬಗೆಟ್ ಪಾತೆರ್ನ ಹಿಂದೂ ಪರ ಅರ್ಜಿದಾರೆರೆ ವಕೀಲೆರಾಯಿನ ವಿಷ್ಣು ಶಂಕರ್ ಜೈನ್ ಮೇರ್, “ಹಿಂದೂಲು ‘ವ್ಯಾಸ್ ಕಾ ತೆಖಾನಾ’ಡ್ ಪ್ರಾರ್ಥನೆ ಮನ್ಪೆರ ಅವಕಾಶ ಕೊರ್ತೆರ್. ನನ 7 ದಿನೊಟು ಪೂಜೆ ಸುರುವಾಪುಂಡು. ಮಾತೆರೆಗ್ಲಾ ಪೂಜೆ ಮನ್ಪುನ ಹಕ್ಕ್ ಉಂಡು. ಜಿಲ್ಲಾಡಳಿತ 7 ದಿನೊಟು ಬೋಡಾಪಿನ ವೆವಸ್ಥೆ ಮನ್ಪೊಡು” ಪಂದ್ ಪಂಡೆರ್.
ಜ್ಞಾನವಾಪಿ ಪಲ್ಲಿದ ಮುಚ್ಚಿಇನ ಜಾಗೆಲೆಡ್ ತೋಜಿದ್ ಬೈದ್ಂಡ್ ಪಂದ್ ಪನ್ಪುನ ‘ಶಿವಲಿಂಗೊ’ದ ಸ್ವರೂಪ ಬೊಕ್ಕ ಸಂಬಂಧಿತಿನ ಲಕ್ಷಣೊಲೆನ್ ನಿರ್ಧರಿಪೆರ ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆಗ್ ನಿರ್ದೇಶ ಕೊರೊಡು ಪಂದ್ ಹಿಂದೂ ಮಹಿಳಾ ಫಿರ್ಯಾದಿಲು ಸುಪ್ರೀಂ ಕೋರ್ಟ್‌ಗ್ ಅರ್ಜಿ ಸಂದಾದಿತ್ತೆರ್. ಅಂಚಾದ್ ಇಂಚಿಪ್ಪೊಗು ಪುರಾತತ್ವ ಇಲಾಖೆ ಪಲ್ಲಿಡ್ ಸಮೀಕ್ಷೆ ಮಲ್ತಿತ್ತ್‌ದ್, ಅವೆತ ವರದಿ ಒಂತೆ ದಿನ ದುಂಬು ಬುಡುಗಡೆ ಆದಿತ್ತ್ಂಡ್. ಮಂದಿರೊನು ಜರ್ತ್‌ದ್ ಪಲ್ಲಿ ಕಟ್ಟ್‌ದಿನ ಅತ್ತ್, ಮಂದಿರೊದ ಮಿತ್ತ್‌ಡೇ ಪಲ್ಲಿ ಕಟ್ಟ್‌ದೆರ್ ಪಂದ್ ಸಮೀಕ್ಷೆದ ವರದಿ ಪಂದಿತ್ತ್ಂಡ್.