Last updated on September 15th, 2025 at 03:46 pm
ಕುಂದಾಪುರ: ತುಳುನಾಡ ಮೂಲ ನಿವಾಸಿಲೆಡ್ ಒಂಜಿ ಆಯಿನ ಕೊರಗ ಸಮುದಾಯೊದ ಬುಲೆಚ್ಚಿಲ್ಗ್ ಕೋಟಿಗಟ್ಲೆ ಕರ್ಚಿ ಮಲ್ತೊಂದುಲ್ಲ ಪನ್ದ್ ಪನ್ಪಿನ ಸರಕಾರೊಲು, ಇಲ್ಲ್ ಮಂಜೂರ್ ಮಲ್ತ್ದ್, ಕಟ್ಟ್ದಾಪಿನ ನಿಲವುಗು ಎತ್ತ್ಂಡಲಾ, ಅವೆತ ಕಡೀರ ಕಂತ್ದ ಕಾಸ್ಲಾ ಕೊರಂದೆ ಕಡೆಸ್ಸಾವೊಂದುಂಡು. ಇಲ್ಲ್ ಕಟ್ಟೆರ ಬೇತೆ ಕಡೆರ್ದ್ ಕಡ ಗೆತೊಂದು, ಕಟ್ಟೆರಾವಂದೆ ಬಂಙ ಬರೊಂದುಪ್ಪುನ ಪರಿಸ್ಥಿತಿ ಎಚ್ಚಿನ ಕೊರಗ ಸಮುದಾಯೊದಕ್ಲೆನ ಆದುಂಡು.
ಕೊರಗೆರೆಗ್ ರಾಜೀವ್ ಗಾಂಧಿ ವಸತಿ ನಿಗಮೊದಡಿಟ್ ಇಲ್ಲ್ ಮಂಜೂರಾದ್ ಪಾಕ ವರ್ಸ ಕರೀಂಡಲಾ ನನಲಾ ಎಚ್ಚಿನವು ಕಟ್ಟ್ದೇ ಆತಿಜಿ. ಸರಕಾರೊರ್ದು ಆವೊಡಾಯಿನ ಪೊರ್ತುಡು ಕಾಸ್ ಬುಡುಗಡೆ ಆವಂದಿನನೇ ಉಂದೆಕ್ ನೆವನ. ಕಾಸ್ ಬರಂದೆ ಕೊರ್ರೆ ಕೊಟ್ಟದ ಕನೊಕು ಕೆರನ ಪತ್ತಿಲೆಕಾತ್ಂಡ್.
ಇಲ್ಲ್ದ ಬೇಲೆ ಸುರು ಮಲ್ಪೆರೆ ಪಾವನೆದ್ದಿ
ಕೊರಗೆರೆಗ್ ಬೋಡಾಯಿನಾತ್ ಸರಕಾರಿ ಯೋಜನೆಲು ಇತ್ತ್ಂಡಲಾ, ಅವು ಒವ್ಲಾ ತಿಕ್ಕೊಡಾಯಿನಕ್ಲೆಗ್ ತಿಕ್ಕೊಂದಿಜ್ಜಿ. ಬೋಡಾಪಿನಕ್ಲೆಗ್ ಒವ್ವೇ ಸೌಲತ್ತ್ಲಾ ತಿಕ್ಕೊಂದಿಜ್ಜಿ, ವಸತಿ ಯೋಜನೆದಡಿಟ್ ಇಲ್ಲ್ ಮಂಜೂರಾಂಡಲಾ, ಐತ ಕಾಸ್ ತಿಕ್ಕುನು ಮಾತ್ರ ನಿಲವು ನಿಲವುಡು, ಪನ್ಡ ಫೌಂಡೇಶನ್ ಆದ್, ಮದೆಲ್ದ ಬೇಲೆ ಮುಟ್ಟುನಗ ಸುರುತ ಕಂತ್ ಬರ್ಪುಂಡು. ತೂವೊಡಾಂಡ ಎಚ್ಚಿನ ಕೊರಗ ಕುಟುಮೊಲೆಗ್ ಕೊಟ್ಟದ ಬೇಲೆ ಸುರು ಮಲ್ಪೆರಲಾ ಪಾವನೆ ಇಪ್ಪುಜಿ. ಉಂದೆರ್ದಾವರ ಇಲ್ಲ್ ಮಂಜೂರಾದ್ ವರ್ಸ ಐನ್ ಕರೀಂಡಲಾ, ಏತೋ ಇಲ್ಲಲೆನ ಬೇಲೆ ನನಲಾ ಸುರು ಆತಿಜಿ.
ಒಡಿಪು, ಮಂಗಳೂರು ಜಿಲ್ಲೆಡ್ 679 ಕೊಟ್ಟ(ಇಲ್ಲ್) ಮಂಜೂರ್
ಒಡಿಪು ಜಿಲ್ಲೆಡ್ 11,133 ಕೊರಗೆರ್ ಇತ್ತ್ದ್, 2,642 ಇಲ್ಲ್ಲ್ ಉಲ್ಲ. ವಸತಿ ಯೋಜನೆದಡಿಟ್ ಜಿಲ್ಲೆಡ್ ದುಂಬುದ 3.73 ಲಕ್ಷ ರೂ. ಕಾಸ್ಡ್ 325 ಇಲ್ಲ್ಲ್ ಮಂಜೂರಾತ. ನನ ಪೊಸತಾದ್ 4.50 ಲಕ್ಷ ರೂ. ಡ್ 150 ಇಲ್ಲ್ಲ್ ಮಂಜೂರಾತ. ಪಿಎಂ – ಜನ್ಮನ್ ಯೋಜನೆಡ್ ನನಲಾ ಒವ್ವೇ ಇಲ್ಲ್ ಮಂಜೂರಾತಿಜಿ. ಮಂಗಳೂರು ಜಿಲ್ಲೆಡ್ 4,680 ಜನಸಂಖ್ಯೆ ಇತ್ತ್ದ್, 1,230 ಕೊರಗ ಕುಟುಮೊಲು ಉಲ್ಲ. ಜಿಲ್ಲೆಡ್ ಒಟ್ಟಾರೆ 264 ಇಲ್ಲ್ ಕಟ್ಟುನ ಈಡ್ ಇತ್ತ್ದ್, 4.50 ಲಕ್ಷ ರೂ. ಯೋಜನೆಡ್ 74 ಇಲ್ಲ್ ಮಂಜೂರಾದಿತ್ತ್ಂಡ, 3.73 ಲಕ್ಷ ರೂ.ಡ್ 72 ಇಲ್ಲ್ ಬೊಕ್ಕ ಪಿಎಂ- ಜನ್ಮನ್ ಯೋಜನೆಡ್ 23 ಇಲ್ಲ್ಲ್ ಮಂಜೂರಾತ.