Last updated on October 30th, 2025 at 03:48 pm
ಕುಡ್ಲ, ಅ. 30: ಸಂಗೀತ ಶಿಕ್ಷಕೆ ರುಬೆನ್ ಜೇಸನ್ ಮಚಾದೊ ಮೇರ್ ಕುಡ್ಲದ ಸೈಂಟ್ ಅಲೋಶಿಯೆಸ್ ಪರಿಗಣಿತ ವಿವಿದ ಸ್ವಿಮ್ಮಿಂಗ್ ಪೂಲ್ಡ್ ಪುರಲ್ ಉರಿತೊಂದು ಸುಮಾರ್ 700 ಮೀಟರ್ರ್ದ್ಲಾ ಎಚ್ಚ ದೂರೊನು ಬೆರಿಟ್ ಮೀಂದ್ದ್ (ಬ್ಯಾಕ್ ಸ್ಟ್ರೋಕ್ ಸ್ವಿಮ್) ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ಡ್ ದಾಕಲೆ ಬರೆತೆರ್.
29 ವರ್ಸ ಪ್ರಾಯೊದ ಸಂಗೀತಗಾರೆ ಮಚಾದೊ ಸ್ವಿಮ್ಮಿಂಗ್ ಪೂಲ್ಡ್ ಬುಧವಾರ ಕಾಂಡೆ 10 ಗಂಟೆಗ್ ಪುರಲ್(Flute) ಉರಿತೊಂದು ಮೀಂದ್ಯೆರೆ ಸುರು ಮಲ್ತ್ದ್ 5 ಸುತ್ತು ಬೊಕ್ಕ 75 ಮೀ. ಮೀಂದ್ದ್ ದಾಕಲೆ ಮಲ್ದೆರ್. ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್ ಸಂಸ್ಥೆ ಮೆರೆನ ಸಾದಗೊನು ಗುರ್ತ ಪತ್ತ್ದ್, ಅಧಿಕೃತ ಪ್ರಮಾಣ ಪತ್ರ ಕೊರ್ತುಂಡು. ನ್ಯಾಶನಲ್ ಇನ್ಸ್ಟಿಟ್ಯೂಟ್ ಆಫ್ ವಾಟರ್ ಸೇಫ್ಟಿ ಕೂಟೊದ ಅಧಿಕೃತ ಲೈಫ್ ಸೇವರ್ ಆದುಪ್ಪುನ ರುಬೆನ್ ರುಬೆನ್ ಜೇಸನ್ ಮಚಾದೊ ಮೇರ್ ಹಿಂದೂಸ್ತಾನಿ ಪುರಲ್ ಬೊಕ್ಕ ವೆಸ್ಟರ್ನ್ ಫ್ಲೂಟ್ಡ್ ಚಾತುರ್ಪು ಇತ್ತಿನಾರ್.
ಸ್ಯಾಕ್ಸೋಫೋನ್, ಗಿಟಾರ್ ಅಂಚೆನೇ ಬೇತೆ ವಾದ್ಯೊಲೆನ್ ತೆರಿದಿನ ರುಬೆನ್ ಜೇಸನ್ ಮಚಾದೊ ಬಾಲಿವುಡ್, ಸ್ಯಾಂಡಲ್ವುಡ್ ಬೊಕ್ಕ ಕೋಸ್ಟಲ್ ಪಿಚ್ಚರ್ಲೆಗ್ ಸಂಗೀತ ಕೊರ್ತೆರ್. ಭಾರತೊದ ಪ್ರಮುಖ ಕಾರ್ಯಕ್ರಮೊಲೆಡ್ ಪ್ರದರ್ಶನ ಕೊರ್ತಿನ ಮೇರ್ 2016ಟ್ ನಡತಿನ ವರ್ಲ್ಡ್ ಕಲ್ಚರ್ ಫೆಸ್ಟಿವಲ್ಡ್ 150ರ್ದ್ಲಾ ಎಚ್ಚ ದೇಶೊಲೆನ ಸಂಗೀತಗಾರೆರೆ ಒಟ್ಟುಗು ಗಿನ್ನೆಸ್ ವಿಶ್ವ ದಾಖಲೆದ ಲೇಸ್ಡ್ ಪಾಲ್ಪಡೆದಿತ್ತೆರ್.
ಸೈಂಟ್ ಅಲೋಸಿಯಸ್ ಕಾಲೇಜಿಡ್ ಸುಮಾರ್ ರಡ್ಡ್ ವರ್ಸ ಪತ್ರಿಕೋದ್ಯಮ ವಿಭಾಗೊಡು ಉಪನ್ಯಾಸಕೆರಾದಿತ್ತಿನ ರುಬೆನ್ ಪುರಲ್ ವಾದನೊಡು 15 ವರ್ಸೊದ ಅನುಭವ ಇತ್ತಿನಾರ್. ಈ ದಾಕಲೆದ ಪೊರ್ತುಡು ಸೈಂಟ್ ಅಲೋಶಿಯೆಸ್ ಪರಿಗಣಿತ ವಿವಿ ಉಪಕುಲಪತಿ ಡಾ. ಪ್ರವೀಣ್ ಮಾರ್ಟಿಸ್, ರುಬೆನ್ ರೆನ ಬೊಡೆದಿ ಅನುಷಾ ಬೊಕ್ಕ ಇಲ್ಲದಕುಲು ಇತ್ತೆರ್.