Last updated on November 5th, 2025 at 08:48 am
ಬೊಲ್ತೇರ್, ನ. 04: ಪದ್ಮುಂಜಡ್ ಸಿದ್ದೀಕ್ ಪನ್ಪಿನಾರ್ ಬುಡೊಂದಿತ್ತಿನ ಗಾಡಿನ್ ಉಂತಾದ್ ಪೆದಂಬು ನೆರ್ದ್, ಆಕ್ದ್ ಕೆರ್ಪೆ ಪನ್ದ್ ಪೋಡಿಕಟ್ಟಾದಿತ್ತಿನ ಆರೋಪಿ ಶರತ್ ಚೌಟ ಪನ್ಪಿನಾಯಗ್ ಬೊಲ್ತೇರ್ ನ್ಯಾಯಂತಡೆ ಶಿಕ್ಷೆ ಕೊರ್ದು ತೀರ್ಪು ಕೊರ್ತುಂಡು.
ನಡಕೆದ ಒಲವು: 2024ತ ಆಗಸ್ಟ್ 27ತಾನಿ ರಾತ್ರೆ 7.30ತ ಅಂದಾಜಿಗ್ ಸಿದ್ದೀಕ್ ಪನ್ಪಿನಾರ್ ತನ್ನ ಗೂಡ್ಸ್ ಗಾಡಿನ್ ಕಲ್ಲೇರಿ ದಂಚಿರ್ದ್ ಆರೆನ ಇಲ್ಲಗ್ ಬುಡೊಂದು ಪೋವೊಂದುಪ್ಪುನಗ ಕಣಿಯೂರು ಗ್ರಾಮೊದ ಪದ್ಮುಂಜಡ್ ಸಾದಿ ಬರಿಟ್ ಉಂತುದು ಶರತ್ ಚೌಟೆ ಫೋನ್ಡ್ ಪಾತೆರೊಂದಿತ್ತೆ. ಈ ಪೊರ್ತುಡು ಸಿದ್ದಿಕ್ ನ್ ತೂದು ಪೆದಂಬು ನೆರ್ದ್ ಸಿದ್ದಿಕ್ ನ ಗಾಡಿನ್ ತನ್ನ ಬೈಕ್ಡ್ ಬೆರಿಪತ್ತ್ದ್ ಓವರ್ ಟೇಕ್ ಮಲ್ತ್ದ್ ಗಾಡಿಗ್ ಆಡ್ಡ ದೀದ್ ಗಾಡಿದ ಡೋರ್ ದೆತ್ತ್ದ್ ಕೀ ತಿರ್ಗಾದ್ ಬಂದ್ ಮಲ್ತ್ದ್ ಕುಡ ಪೆದಂಬು ನೆರ್ದ್ ತರೆ ಬೊಕ್ಕ ತಿಗಲೆಗ್ ಕೈಟ್ ಗುದ್ದುದಿತ್ತೆ. ಆತೇ ಅತ್ತಂದೆ ಈ ನನೊರ ತಿಕ್ಕುವ ಅತ್ತ ಪನ್ದ್ ಪೋಡಿಕಟ್ಟಾದಿತ್ತೆ ಪನ್ದ್ ಉಬಾರ್ ಪೊಲೀಸ್ ಸ್ಟೇಶನ್ಡ್ ಬಿಎನ್ಎಸ್ ಕಲಂ 126 (2) 115(2), 352 ಬೊಕ್ಕ 351(2)ತ ಅಡಿಟ್ ಪ್ರಕರಣ ದಾಕಲಾದಿತ್ತ್ಂಡ್. ಬೊಕ್ಕ ತನಿಖಾಧಿಕಾರಿ ಬೊಲ್ತೇರ್ ನ್ಯಾಯಂತಡೆಕ್ ಆರೋಪಿನ ಮಿತ್ತ್ ಚಾರ್ಜ್ಶೀಟ್ ಸಂದಾದೆರ್.
ಈ ಪ್ರಕರಣೊದ ಸಾಕ್ಷಿ ವಿಚಾರಣೆ ಮಲ್ತಿನ ಬೊಲ್ತೇರ್ ಪ್ರಧಾನ ಪೆರಿಯ ಸಿವಿಲ್ ಬೊಕ್ಕ ಜೆ.ಎಂ.ಎಫ್.ಸಿ. ನ್ಯಾಯಂತಡೆದ ನ್ಯಾಯಾಧೀಶೆ ಮನು ಬಿ.ಕೆ. ಮೇರ್ ಆರೋಪಿ ಶರತ್ ಚೌಟನ್ ದೋಷಿ ಪನ್ದ್ ತೀರ್ಮಾನಿತ್ದ್ ಕರ್ಪಿಲ್ಲ ಶಿಕ್ಷೆ ಕೊರ್ದು ತೀರ್ಪು ಕೊರ್ತೆರ್. ಬಿಎನ್ಎಸ್ 115 (2)ತ ಅಪರಾಧೊಗು ಒಂಜಿ ವರ್ಸ ಸಾದಾ ಕರ್ಪಿಲ್ಲ್ ಶಿಕ್ಷೆ, 5 ಸಾರ ರೂ ದಂಡ, ದಂಡ ಕಟ್ಟೆರೆ ತತ್ತ್ಂಡ 3 ತಿಂಗೊಲು ಎಚ್ಚಿಗೆ ಕರ್ಪಿಲ್ಲ್ ಶಿಕ್ಷೆ, 126(2)ತ ಅಪರಾಧೊಗು ಒಂಜಿ ತಿಂಗೊಲು ಕರ್ಪಿಲ್ಲ್, 1 ಸಾರ ರೂ ದಂಡ, ದಂಡ ಕಟ್ಟಿಜಿಂಡ 10 ದಿನ ಎಚ್ಚಿಗೆ ಶಿಕ್ಷೆ, 352 ಬೊಕ್ಕ 351(1)ತ ಅಪರಾಧೊಗು ಒಂಜಿ ಒಂಜಿ ವರ್ಸ ಕರ್ಪಿಲ್ಲ್, 3 ಸಾರ ರೂ ದಂಡ, ದಂಡ ಕಟ್ಟಿಜಿಂಡ ಆಜಿ ತಿಂಗೊಲು ಎಚ್ಚಿಗೆ ಕರ್ಪಿಲ್ಲ್ ಶಿಕ್ಷೆ ಕೊರ್ದು ತೀರ್ಪು ಕೊರ್ತೆರ್. ಈತ್ ಶಿಕ್ಷೆನ್ ಒಟ್ಟುಗೇ ಅನುಭವಿಪೊಡು ಅತ್ತಂದೆ ಪಾಡ್ದಿನ ಫೈನ್ದ ಕಾಸ್ನ್ ಬಿಎನ್ಎಸ್ಎಸ್ ಕಲಂ 395ತ ಅಡಿಟ್ ಸಂತ್ರಸ್ತೆ ಸಿದ್ದೀಕ್ ಗ್ ಪಿರಿಕಟ್ಟ್ ಆದ್ ಕೊರೊಡು ಪನ್ದ್ ಕೋರ್ಟ್ ತನ್ನ ಆದೇಶೊಡು ತೆರಿಪಾದ್ಂಡ್.