Last updated on November 5th, 2025 at 10:26 am
ಕುಡ್ಲ, ನ. 4: ಸಂಸಾರೊದ ಕೊಲಲೊದ ಬೆಸರ್ಡ್ ಜವನೆ ಒರಿ ತನ್ನ ನಾಲ್ ವರ್ಸ ಪ್ರಾಯೊದ ಮಗಲೆನೊಟ್ಟುಗು ಆತ್ಮಹತ್ಯೆ ಮಲ್ತೊನ್ರ ತೂದಿತ್ತ್ದ್, ಪಣಂಬೂರು ಪೊಲೀಸೆರೆ ರಪಕ್ಕ ಕಾರ್ಯಾಚರಣೆಡ್ ಇರ್ವೆರೆ ಜೂವ ಒರಿದ್ಂಡ್. ಕಾವೂರುಡು ಈ ನಡಕೆ ನಡತ್ದ್ಂಡ್.
ಕಾವೂರು ಅಂಬಿಕಾ ನಗರ ನಿವಾಸಿ ರಾಜೇಶ್ (35) ಸಯ್ಯೆರೆ ಪೋದು ಪೊಲೀಸೆರೆರ್ದಾವರ ಬದ್ಕಿನಾರ್. ಬೊಡೆದಿನೊಟ್ಟು ಲಡಯಿ ಆದ್ ಬೆಸರ್ಡ್ ಕಂಡನೆ ರಾಜೇಶ್ ಸೋಮಾರ ಬಯ್ಯ ತನ್ನ ಮಗಲೆನ್ ಲೆತೊಂದು ತೆನ್ರಾಯಿ ಬೀಚ್ಗ್ ಪೋದಿತ್ತ್ದ್ “ನಮ ಪೋಯಿ ಸೈಕ ಮಗಲೇ, ಸೂಸೈಡ್ ಮಲ್ತೊನುಗ ಆವೇ, ಅಮ್ಮಲಾ ಬೊರ್ಚಿ ಏರ್ಲಾ ಬೊರ್ಚಿ ನಮಕ್, ನಿನ್ನ ಅಪ್ಪೆ ನೆಮ್ಮದಿಡ್ ಕುಸಿಟ್ ಇಪ್ಪಡ್, ನನ ಏರ್ನ ಒಟ್ಟುಗುಲಾ ಪೋಯೆರ ಇತ್ತ್ಂಡ ಪೋವಡ್” ಪನೊಂದು ನೀರ್ದಂಚಿ ನಡತೊಂದು ಪೋಪುನ ವಿಡಿಯೋ ಮಲ್ತ್ದೆರ್. ವಿಡಿಯೋಡ್ ಪಾತೆರೊಂದು ಕಡಲ್ದಂಚಿ ನಡತೊಂದು ಪೋಪುನ ಮಾತ್ರ ಇತ್ತ್ಂಡ್. ಒಲ್ಪದ ವಿಡಿಯೋ ಪನ್ದ್ ಗೊತ್ತಾವೊಂದಿಜ್ಜಂಡ್. ಆಂಡ ಎಲ್ಯ ಬಾಲೆ ಸೈಪುನ ಬೊರ್ಚಿ ಅಪ್ಪ ಪನ್ಪುನ ವೀಡಿಯೊಡು ಕೇನೊಂದಿತ್ತ್ಂಡ್. ಈ ವಿಡಿಯೋ ವಾಟ್ಸಪ್ ಡ್ ವೈರಲ್ ಆತ್ಂಡ್.
ಈ ವೈರಲ್ ವಿಡಿಯೋ ಪಣಂಬೂರು ಪೊಲೀಸೆರೆಗ್ ಎತ್ತ್ದ್ಂಡ್. ಆಂಡ ವಿಡಿಯೋಡ್ ಆಯನ ಮೋನೆ ತೋಜೆದಿಜಿ. ಕಾಲಿ ಕಡಲ್ದಂಚಿ ನಡತೊಂದು ಪೋಪುನು, ಅವೆಟ್ ಅಮ್ಮೆ- ಮಗಲೆನ ನೆರೆಲ್ ಮಾತ್ರ ಇತ್ತ್ಂಡ್. ಪಣಂಬೂರು ಬೀಚ್ ಆದುಪ್ಪು ಪನ್ದ್ ಪೊಲೀಸೆರ್ ಅಪಗನೇ ಅಡೆ ಪೋದು ನಾಡೆರೆ ಪತ್ತ್ದೆರ್. ಅಂಚೆನೇ ತೆನ್ರಾಯಿ ಕಡಲ ಕರೆಕ್ಲಾ ಪೋಲೀಸ್ ಸಿಬ್ಬಂದಿ ಪೋದು ನಾಡ್ದೆರ್. ಈ ಪೊರ್ತುಡು ಬಾಲೆದ ಒಟ್ಟುಗು ಒರಿ ಬತ್ತಿತ್ತೆ ಪನ್ದ್ ಪತ್ತ ಆತ್ಂಡ್. ಅಪಗನೇ ಪೊಲೀಸೆರ್ ಜವನನ ಪುರಪು ನಾಡ್ಪತ್ತ್ದೆರ್.
ಜವನೆ ಕಾವೂರು ಅಂಬಿಕಾ ನಗರದಾಯೆ ಪನ್ದ್ ತೆರಿದ್ ಬತ್ತಿನೇ ಅಡೆ ಪೋತಿನ ಪೊಲೀಸೆರ್, ಇಲ್ಲದ ಉಲಯಿ ಪೊಗ್ಗುನಗ ರಾಜೇಶ್ ಪಕ್ಕಾಸ್ಗ್ ಬಲ್ಲ್ ಪಾಡ್ದ್ ಮಗಲೆನ ಒಟ್ಟುಗು ಉರ್ಲುಗು ನಾಲಿ ಕೊರ್ರ ರೆಡಿಯಾದಿತ್ತೆ. ಪೊಲೀಸೆರ್ ಆಯನ್ ಪತೊಂದು ಸಾವುದ ಬಾಯಿಡ್ ಇತ್ತಿನ ಅಮ್ಮೆ-ಮಗಲೆನ ರಕ್ಷಣೆ ಮಲ್ತ್ದೆರ್. ರಡ್ಡ್ ನಿಮಿಷ ಕಡೆಸ್ಸುಂಡಲಾ ರಡ್ಡ್ ಜೂವ ಪೋತು.
ಪೊಲೀಸೆರೆ ಸಮಯ ಪ್ರಜ್ಞೆ ಬೊಕ್ಕ ಕ್ಷಿಪ್ರ ಕಾರ್ಯಾಚರಣೆ ರ್ದಾವರ ಎಲ್ಯ ಬಾಲೆ ಬೊಕ್ಕ ಬಾಲೆದಮ್ಮನ ಜೂವ ಒರಿದ್ಂಡ್.