Last updated on May 22nd, 2026 at 10:40 am
ಬೆಂಗಳೂರ್, ಮೇ 22: ಕೈಕಂಜಿಲೆನ ವ್ಯಾಕ್ಸೀನ್ ದಾಖಲೆ, ಆರೋಗ್ಯ ಸ್ಥಿತಿ, ಇನ್ಶೂರೆನ್ಸ್ ಬೊಕ್ಕ ತೀರ್ನೆತ ಪಿರಿಕಟ್ಟ್ಗ್ ಸಂಬಂಧಿತಿನ ಒಲವುಲೆನ್ ಸುಲಭೊಡು ಟ್ರ್ಯಾಕ್ ಮಲ್ಪೆರ ಅನುಕೂಲ ಆಪಿದ ದಿಟ್ಟಿಡ್ ಕೈಕಂಜಿಲೆಗ್ ಮುಜಲ್ ಬಯೋಮೆಟ್ರಿಕ್ಸ್ ಆಧಾರಿತ ಡಿಜಿಟಲ್ ಗುರ್ತೊದ ವ್ಯವಸ್ಥೆನ್ ರಾಜ್ಯ ಸರ್ಕಾರ ಕನಯೆರ ಪಿದಡ್ದ್ಂಡ್. ಬಾರ್ಕೋಡ್ ಆಧಾರಿತ ಈ ವ್ಯವಸ್ಥೆ ಕೈಕಂಜಿಲೆನ ಆಧಾರ್ ಕಾರ್ಡ್ದ ಲೆಕ ಬೇಲೆ ಮಲ್ಪುಂಡು.
ಭಾರತೊದ ಕಡೀರ ಪ್ರಯೋಗ:
ಈ ಯೋಜನೆ ಭಾರತೊಡೇ ಕಡೀರ ಸರ್ತಿ ಜಾರಿಗ್ ಬರೊಂದಿತ್ತ್ದ್, ಕೆಬಿಕ್ ಟ್ಯಾಗ್ ಪಾಡುನ ಪರ ಪದ್ಧತಿಗ್ ಪರ್ಯಾಯ ಆವರೆ ಉಂಡು. ಬರ್ಪಿ ದಿನೊಟು ರೈತೆರ್ ಅಕ್ಲೆನ ಕೈಕಂಜಿಲೆನ ಫೋಟೋನ್ ಉಂದೇ ವ್ಯವಸ್ಥೆದ ಮುಕೇನ ಅಪ್ಲೋಡ್ ಮಲ್ಪುನ ಅವಕಾಶೊಲಾ ಇಪ್ಪುಂಡು. ಅಂಚಾದ್ ಡಿಜಿಟಲ್ ಆರೋಗ್ಯ ಪರಿಶೀಲನೆ ಬೊಕ್ಕ ಸರ್ಕಾರೊದ ಸೇವೆಲೆನ್ ಬೇಗ ಗೆತೊನರೆ ಸಕಾಯ ಆಪುಂಡು.
ಈ ಬಗೆಟ್ ಒಲವು ಕೊರ್ತಿನ ಸಿಬ್ಬಂದಿ ಬೊಕ್ಕ ಆಡಳಿತ ಸುಧಾರಣಾ ಇಲಾಖೆದ (ಇ-ಆಡಳಿತ) ಪ್ರಧಾನ ಕಾರ್ಯದರ್ಶಿ ಪಂಕಜ್ ಕುಮಾರ್ ಪಾಂಡೆ, ನರಮಾನ್ಯನ ಬಿರೆಲಚ್ಚಿದ ಲೆಕ ಕೈಂಜಿಲೆನ ಮೂಂಕುದ ಗೀಟ್ಲ್ ವಿಶಿಷ್ಟವಾದ್ ಇಪ್ಪುವ. ಅವೆತ ಆಧಾರೊಡು ನಿಖರ ಗುರ್ತೊದ ವ್ಯವಸ್ಥೆ ಮಲ್ತ್ದ್ಂಡ್ ಪನ್ದ್ ತೆರಿಪಾದೆರ್. ಈ ಯೋಜನೆ ಪಶುಸಂಗೋಪನೆಗ್ ಸಂಬಂಧಿತಿನ ಯೋಜನೆಲೆಡ್ ನಡಪುನ ದಗೆನ್ ಉಂತಾಯೆರ ಅಂಚೆನೇ ಪಾರದರ್ಶಕತೆ ಎಚ್ಚ ಮಲ್ಪೆರ ಸಕಾಯ ಆಪುಂಡು ಪನ್ದ್ ಆರ್ ಪನ್ಡೆರ್.
ಈ ಯೋಜನೆರ್ದಾವರ ರೈತೆರೆಗ್ ವ್ಯಾಕ್ಸೀನ್ದ ದಿನೊತ ಬಗೆಟ್ SMS ಅಲರ್ಟ್ ಬರ್ಪುಂಡು. ಎಲ್ಯ ಕಂಜಿಲೆನ ಡಿಜಿಟಲ್ ದಾಖಲೆ ಲಾ ಮಲ್ಪೊಲಿ. ದುಂಬಗ್ ಮೂಂಕುದ ಫೋಟೋ ಸ್ಕ್ಯಾನ್ ಮಲ್ತ್ದ್ ಆರೋಗ್ಯ ತಪಾಸಣೆಲಾ ಮಲ್ಪೊಲಿ. AI ಆಧಾರಿತ ಈ ವ್ಯವಸ್ಥೆ ಪಶುಸಂಗೋಪನೆ ಕ್ಷೇತ್ರೊಡು ಡಿಜಿಟಲ್ ಆಡಳಿತೊನು ನನಲಾತ್ ಗಟ್ಟಿ ಮಲ್ಪುನೆತ ಒಟ್ಟುಗು ಕೈಕಂಜಿಲೆನ ಟ್ರ್ಯಾಕಿಂಗ್ ಬೊಕ್ಕ ದೃಢೀಕರಣ ಪ್ರಕ್ರಿಯೆನ್ಲಾ ಪರಿಣಾಮಕಾರಿ ಮಲ್ಪರೆ ಉಂಡು ಪನ್ದ್ ದಿ ನ್ಯೂ ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಮಲ್ತ್ದ್ಂಡ್.